बिराटनगर । कोशी प्रदेशको राजधानी विराटनगरमा विद्यार्थीहरुले एउटा सरकारी गाडी जलाइदिएका छन् भने पाँचवटा गाडी तोडफोड गरेका छन् । मोरङको रंगेलीमा ६ जना विद्यार्थी पक्राउ परेको विरोधमा आन्दोलनमा उत्रिएका विद्यार्थीहरुले आइतबार बिहान महेन्द्र मोरङ आदर्श बहुमुखी क्याम्पस अगाडि सरकारी गाडी जलाएका हुन् ।
मोरङ क्याम्पस अगाडी सडकमा गुडिरहेको प्रदेश योजना आयोगको को- १ झ ६४४ नम्बरको गाडीमा ढुंगामुडा गर्दै विद्यार्थीले आगजनी गरेका हुन् । प्रहरीका अनुसार बा एबी ८१८०, बागमती प्रदेश ०१–०० ञ २७०१, बा १ ञ २४१९, बा ००१ ञ २७९० र बा १ ञ १८८७ नम्बरको गाडीमा तोडफोड गरिएको छ ।
घटनामा संलग्नहरुको पहिचान गर्ने काम भईरहेको बताउँदै प्रहरीले रंगेली घटनाको कारण जोडिएपनि मनसाय गलत राखिएकोले संलग्नहरुको पहिचान गरेर कारवाहीको दायरामा ल्याईने बताएका छन् । उपप्रधान तथा गृहमन्त्री रवि लामिछाने राजस्व अभिवृद्धि तथा चुहावट नियन्त्रणसम्बन्धी गोष्ठीमा सहभागी हुन विराटनगर आएका हुन् । विमानस्थलमा उनी ओर्लनु साथ मोरङ क्याम्पसमा आगजनी र पाञ्चालीमा तोडफोड गरेर कमजोर सुरक्षा व्यवस्था रहेको संकेत दिइएको छ । स्रोत : आवर बिराटनगर
Nepali