झापा । झापाको झापा गाउँपालिका–१ सुडुखुट्टुस्थित क्षेत्रबाट लागुऔषधसहित एक जना भारतीय नागरिक पक्राउ परेका छन्।
आज दिउँसो ३ बजे ईलाका प्रहरी कार्यालय कुमरखोदबाट खटिएको गस्ती टोलीले भारत बिहार राज्य, किसनगंज जिल्लाको सिंगिमारी पञ्चायत वडा नं. ५ निवासी ६० वर्षीय गबरी साहलाई पक्राउ गरेको हो।
भारतबाट नेपालतर्फ साइकलमा आउँदै गरेका साहलाई शंका लागेपछि प्रहरीले जाँच गर्दा उनी लगाएको ट्रयाक सुटको बायाँ साइडको गोजीमा लुकाइछिपाई ल्याएको लागुऔषध (ब्राउन सुगर) जस्तो देखिने लिसिलो खैरो पदार्थ फेला परेको प्रहरीले जनाएको छ। उक्त पदार्थ प्लास्टिकमा प्याक गरिएको अवस्थामा १०१ ग्राम ६३ मिलिग्राम तौलमा बरामद गरिएको हो।
पक्राउ परेका साहलाई साइकलसहित नियन्त्रणमा लिई थप अनुसन्धान तथा कारबाहीका लागि जिल्ला प्रहरी कार्यालय झापामा राखिएको प्रहरीले जनाएको छ। यस सम्बन्धमा थप अनुसन्धान जारी रहेको छ।
Nepali