मेचिनगर,१९ भदौ। झापाको मेचीनगरमा नेपाल र भारतको खेलाडी सम्मेलीत आठौं “इण्डो नेपाल कराते च्याम्पियनसिप २०२२” प्रतियोगिता आइतबार बाट सुरू भएको छ ।

मेचीनगर ६ स्थित काँकरभिट्टा सामुदायिक भवनमा आजबाट सुरू भएको प्रतियोगितामा प्रदेश नं १ का झापा, मोरङ, सुनसरी, इलाम, धनकुटालगायत सबै जिल्ला तथा छिमेकी मुलुक भारतको दिल्ली, कोलकाता, सिक्किम, आसाम, दार्जिलिङ, सिलुगढी, बागडुग्रालगायत क्षेत्रका खेलाडीहरूले विभिन्न तौल समुहमा प्रतिष्पर्धा गर्दैछन् ।

२० केजी तौलदेखि ६७ केजी तौल समुहका ५ सय महिला तथा पुरूष खेलाडी सहभागी प्रतियोगिता सोमबार सम्म सञ्चालन हुने आयोजक सितोरियो कराते स्कूल डोजो झापाका सचिव शम्भु श्रेष्ठले जानकारी दिए ।

देशलाई अन्तराष्ट्रीय स्तरमा चिनाउने उपयुक्त माध्यम खेलकुद मात्रै भएकाले स्थानीय स्तरबाटै बिगतदेखि अन्तराष्ट्रीय प्रतियोगिता आयोजना गर्दै आएको आयोजक समितिले जनाएको छ । आयोजकका अनुसार प्रतियोगितामा प्रथम, द्धितिय र तृतिय हुने टिमले नगदसहित ट्रफी, मेडल र प्रमाणपत्र प्राप्त गर्नेछन् ।