बिर्तामोड । विर्तामोडमा जारी “प्रथम झापा कप २०८१” मा दर्शकको साथ न्यून रहेको पाइएको छ । मंसिर २९ गतेदेखि विर्तामोडको डोमालाल राजवंशी रंगशालामा सञ्चालन भइरहेको झापा कप फुटबल प्रतियोगितामा दोस्रो क्वाटरफाइनलका खेल सञ्चालन भइसक्दा समेत फुटबल हेर्ने दर्शकको संख्या न्यून रहिरहेको छ । 
खेलमैदानको पुर्व, पश्चिम, उत्तर र दक्षिणमा करिब १० हजार दर्शक अट्ने व्यवस्थित बाँसको प्यारापिट निर्माण गरिएको छ । तर, मैदानको उत्तर, दक्षिण र पश्चिममा विद्यार्थीसहित खेलप्रेमी दर्शकहरू उल्लेख्य रहेपनि पुर्वपट्टी भने वारपार नै दर्शक न्युन रहने गरेका छन् ।
अहिले दैनिक १ देखि ३ हजारको हाराहारीमा दर्शक मैदान उपस्थित हुँदा त्यसको करिब तीन भागको एक भाग चै विद्यार्थी नै रहने गरेका छन् । उनिहरू सबै फुटबलको रूनि भएर आफैं उपस्थित भएका भने होइनन् । उनीहरूलाई विद्यालयले प्रतियोगितामा सहयोग गरे बापत ल्याउने गरेका हुन् । 
प्रतियोगिता हेर्न दर्शकले १०० रूपैयाँको टिकट लिनुपर्ने हुन्छ । त्यस्तै सहयोगी संघ संस्था, कम्पनी, विर्तामोड, कनकाईलगायत केही स्थानीय पालिका, सहयोगी विद्यालयका विद्यार्थी शिक्षकलगायत केही सञ्चारकर्मीलाई पासको व्यवस्था गरिएको छ । यति हुँदाहुँदै पनि जारी प्रतियोगितामा दर्शकको कमि देखिएको छ ।
झापा मात्रै नभएर देशमा नै फुटबल खेलको विकास, प्रवर्द्धन र संवर्धानमा दिलोज्यान दिएर अगाडि बढ्ने व्यक्ति हुन् झापा ११ का वर्तमान अध्यक्ष जलकुमार गुरूङ । तर झापा ११ को आयोजनामा जारी प्रतियोगितामा खेल हेर्ने दर्शकले त्यति साथ नदिएको देखिन्छ ।
यस बिषयमा अध्यक्ष गुरूङसंग कुरा गर्दा झापा ११ पहिलो चरणबाटै बाहिरिएको थिएन भने दर्शक बढ्ने थिए तर त्यसो भएन सायद यसले पनि केही असर पुगेको हुनसक्छ । उनले थपे जति दर्शक छन् त्यो पनि काफि छ । प्रतियोगिता सञ्चालन भएपछि एक जना मात्रै दर्शकले साथ दिएपनि खेल सञ्चालन गर्नै पर्छ । तर, झापा कपमा दैनिक दुई/तीन हजार भएपनि दर्शक आइरहेका छन् । त्यो पनि आयोजकका लागि एउटा उर्जा नै हो, उनले भने । आयोजकको प्रतियोगिता सम्पन्न गर्ने खर्च जोहो भइ सकेको बताउँदै उनले भने सेमिफाइनलका खेलदेखि दर्शक बढ्ने अपेक्षा रहेको बताए ।
पुस ८ गतेसम्म सञ्चालन हुने प्रतियोगिताको विजेताले नगद १० लाख तथा उपजिेताले नगद ५ लाख पुरस्कार पाउने छन् । प्रत्येक खेलको प्लेयर अफ द म्याचले १० हजार नगद पाउनेछन् । प्रतियोगिताको उच्च गोलकर्ता एकजना तथा उत्कृष्ट गोलकिप्पर एकजनालाई ३५ हजार नगद पुरस्कार प्रदान गरिनेछ ।
त्यस्तै, प्रतियोगिताको एक उदीयमान खेलाडीलाई झापा ट्यालेन्ट घोषणा गरेर नगद ३५ हजार रुपैयाँ प्रदान गरिनेछ । प्रतियोगिताको सर्वोत्कृष्ट एकजना खेलाडीलाई मस्ट भ्यालुएवल खेलाडी घोषित गरेर नगद १ लाख रुपैयाँ प्रदान गरिने आयोजकले जनाएको छ ।
Nepali