विर्तामोड । विप्लव नेतृत्वको नेपाल कम्युनिष्ट पार्टी झापाले पार्टीको आगामी रणनीति, सांगठनिक गतिविधि र उत्पादनका विषयमा विभिन्न निर्णयहरु गर्दै जिल्ला समितिको छैटौँ पूर्ण बैठक सम्पन्न गरेको छ । बैठकले विशेष महत्वका विभिन्न निर्णयहरू गर्दै पार्टीको संगठनात्मक सुदृढीकरण र आगामी रणनीतिहरूमा नयाँ मार्गचित्र तय गरेको हो।
जिल्ला बैठकमा पार्टीका केन्द्रीय नीतिहरूलाई जिल्ला हुँदै स्थानीय तहसम्म प्रभावकारी रूपमा कार्यान्वयन गर्नेबारे छलफल भएको बताइएको छ। साथै, जनवर्गीय संगठनहरूको विस्तार, आन्दोलनका स्वरूपहरू र जनसरोकारका मुद्दाहरूलाई केन्द्रमा राखेर कार्ययोजना बनाइएको पार्टीका झापा जिल्ला सचिव सञ्जय सी ले जानकारी दिए।
पार्टीका किराँत लिम्बुवान प्रदेशका इन्चार्ज दिपेश सी ले बैठकलाई सम्बोधन गर्दै संगठनलाई जनतामुखी बनाउने, पार्टीलाई बलियो बनाउने, र सामाजिक रूपान्तरणका लागि प्रभावकारी कदम चाल्ने विषयमा जोड दिए। उनले बदलिंदो राजनीतिक परिस्थितिमा पार्टीको भूमिका र जिम्मेवारी थप महत्वपूर्ण भएको उल्लेख गर्दै आन्दोलनलाई अझ सक्रिय बनाउने प्रतिबद्धता व्यक्त गरे।
बैठकले आगामी महिनाहरूमा आयोजना हुने विभिन्न कार्यक्रम र अभियानहरूको तालिका तयार गर्दै जिल्ला समितिलाई अझ प्रभावकारी बनाउने निर्णय गरेको छ। जिल्ला बैठकले पार्टीको केन्द्रीय नितिलाई स्थानीय तहसम्म पुर्याउने निर्णय गर्दै जिल्ला बैठक सम्पन्न गरेको हो ।
Nepali