मेचीनगर । झापाको मेचीनगर -४ बाहुणडाँगी स्थित सरस्वती माविको खेल मैदानमा जारी इण्डो-नेपाल टि-ट्वान्टी क्रिकेट प्रतियोगिता अन्तर्गत आज भएको खेलमा दमकले विजयी शुरुआत गरेको छ। लर्डबुद्व क्रिकेट क्लबलाई ५० रनले पराजित गर्दै दमकले विजयी शुरुआत गरेको हो ।
टस हारेर व्याटिङको निम्तो पाएको दमकले १६ ओभरमा सबै विकेट गुमाउँदै १४१ रन बनाएको थियोे । दमकका लागि अभिषेक थापालेसर्वाधिक ४७ रन बनाए। उनले २७ बलमा ४७ रन प्रहार गरेका थिए। त्यस्तै दमकका लागि निरज थापाले १५ बलमा ३४रन बनाएका थिए भने विवेक पौडेलले १३ तथा विजयले १२ रन प्रहार गरेका थिए।
बलिङतर्फ लर्डबुद्वका आयुस कार्की र अर्जुन राजवंशीले समान ३- ३ विकेट हात पारे । त्यस्तै क्षितिज पोर्तेलले २ विकेट हात पारे भने प्रवेश दाहाल र रवि गोस्वामिले समान १-१ विकेट हात पारे ।
१४२ रनको विजयी लक्ष्य पछ्याउने क्रममा लर्डबुद्वले मात्रै ९० रन बनाउँदै अलआउट हुन पुग्यो । लर्डबुद्वका लागि क्षितिज पोर्तेलले सर्वाधिक २१ बलमा ३८ रन प्रहार गरे भने सुभम लिम्बूले १२ तथा उत्तम राजवंशीले ११ रन प्रहार गरे। लर्डबुद्वका लागि अन्य ब्याट्सम्यानले दोहोरो अंकमा रन बनाउन सकेनन् ।
यता बलिङतर्फ दमकका विजय तामाङले ४ तथा निरज पाठकले ३ विकेट हात पारे । त्यस्तै विनोद विक, अभिषेक थापा र अनिष खड्काले समान १-१ विकेट हात पारे।
प्रतियोगिताको म्यान अफ द म्याच दमकका निरज पाठक घोषित भए । उनले नगद १ हजार र मायाको चिनो प्राप्त गरे। भोलिको खेल बल ब्लास्टर भद्रपुर र झापा क्रिकेट क्लबबिच हुनेछ।
फागुन २१ गतेबाट शुरु भएको प्रतियोगिताको फाइनल खेल चैत ४ गते सम्पन्न हुनेछ । प्रतियोगिताको विजेता टिमले नगद रु ५० हजार सहित ट्रफी, मेडल र प्रमाणपत्र पाउनेछ भने उपविजेता टिमले नगद रु ३० हजार सहित ट्रफी, मेडल र प्रमाणपत्र प्राप्त गर्नेछ। प्रतियोगिताको मुख्य उद्देश्य बाहुणडाँगीमा क्रिकेट एकेडेमी सञ्चालन गर्ने रहेको आयोजक बाहुणडाँगी युवा क्लबले जनाएको छ।
Nepali