मेचीनगर । झापाको मेचीनगर -४ बाहुनडाँगी स्थित सरस्वती माविको खेल मैदानमा जारी इण्डो-नेपाल टि-ट्वान्टी क्रिकेट प्रतियोगिता अन्तर्गत आज भएको खेलमा आदर्श युवा क्लब बुधबारेलाई ४ विकेटले पराजित गर्दै आयोजक बाहुनडाँगी युवा क्लब सेमिफाइनल प्रवेश गरेको छ।
टस जितेर पहिलो ब्याटिङ गरेको बुधबारेले १६.३ ओभरमा सबै विकेट गुमाउँदै मात्रै ७२ रन बनाएको थियोे । बुधबारेका लागि रिजन लिम्बू र अर्पन कार्कीले सर्वाधिक समान २१ /२१ रन बनाएका थिए। लिम्बू र कार्कीले समान २० बल खेल्दै २१ रन बनाएका थिए । अन्य ब्याट्सम्यानले दोहोरो अंकमा रन बनाउन नसक्दा बुधबारे ७२ रनमै अलआउट भएको थियोे ।
बलिङतर्फ बाहुनडाँगीका लागि सन्तोष प्रधान र नाजिर हुसेनले समान ३-३ विकेट लिए भने अभिषेक दाहाल र र रमन कार्कीले समान २/२ विकेट हात पारे ।
७३ रनको विजयी लक्ष्य पछ्याउने क्रममा बाहुनडाँगीले १६.२ ओभरमा ६ विकेट गुमाउँदै जित निकाल्न सफल भयो । बाहुनडाँगीका लागि रोमन कार्कीले ३८ बलमा ५ चौकाको मद्धतमा २८ रन बनाए भने गणेश पौडेलले ७ बलमा १६ रन बनाएका थिए।
यता बलिङतर्फ बुधबारेका लागि रिजन लिम्बूले सर्वाधिक २ विकेट लिए भने टेकेन्द्र कार्की , अर्जुज बराइली, मन्दिप खरेल र मिरोज सिटौलाले समान १/१ विकेट हात पार्न सफल भए । प्रतियोगिताको म्यान अफ द म्याच बाहुनडाँगीका रोमन कार्की घोषित हुँदै नगद १ हजार र मायाको चिनो प्राप्त गरे। उनले बलिङतर्फ ३ विकेट लिएका थिए भने ब्याटिङतर्फ सर्वाधिक २८ रन प्रहार गरेका थिए।
फागुन २१ गतेबाट शुरु भएको प्रतियोगिताको फाइनल खेल चैत ४ गते सम्पन्न हुनेछ । प्रतियोगिताको विजेता टिमले नगद रु ५० हजार सहित ट्रफी, मेडल र प्रमाणपत्र पाउनेछ भने उपविजेता टिमले नगद रु ३० हजार सहित ट्रफी, मेडल र प्रमाणपत्र प्राप्त गर्नेछ। प्रतियोगिताको मुख्य उद्देश्य बाहुणडाँगीमा क्रिकेट एकेडेमी सञ्चालन गर्ने रहेको आयोजक बाहुणडाँगी युवा क्लबले जनाएको छ।
Nepali