प्रविण अधिकारी
मेचीनगर। झापाको मेचीनगर–८ स्थित ऐतिहासिक तथा धार्मिक पर्यटकीय स्थल पातलगङ्गामा अवस्थित सनसारी माईको मन्दिर सोमबार राति डोजर लगाएर भत्काइएको छ। स्थानीयको आरोप अनुसार मन्दिर सुवास साङ्घाईको स्वामित्वमा रहेको चिया बगानले भत्काएको हो।
हिन्दु धर्मावलम्बीहरूले हरेक वर्ष पातलगङ्गामा जलको कामनाका लागि सनसारी माईको विशेष पूजा गर्ने परम्परा रहेको छ। यही वैशाख २० गतेका लागि पूजा तयारीस्वरूप हालै मन्दिर वरिपरि सिमेन्टको बार लगाई, रङ्ग–रोगन गरेर सिला समेत स्थापना गरिएको थियो।
स्थानीयका अनुसार सोमबार राति करिब १० बजे, बगान प्रशासनले आफ्नो क्षेत्र अतिक्रमण भएको भन्दै जेसीबी प्रयोग गरी मन्दिर तोडफोड गराएको हो। सयौं वर्षदेखि पूजाआजा हुँदै आएको स्थलमा यस्तो घटनाले स्थानीय बासिन्दा आक्रोशित भएका छन्।
उक्त जग्गा नेपाल सरकारको अधीनमा रहेको र सो क्षेत्र ऐतिहासिक धार्मिक एवं पर्यटकीय स्थलको रूपमा चिनिएको स्थानीय प्रशासनले जनाएको छ।
घटनापछि स्थानीयले सांस्कृतिक, धार्मिक सम्पदामाथि गरेको हस्तक्षेपको विरोधमा आन्दोलन गर्ने चेतावनीसमेत दिएका छन्।
Nepali