झापा, २२ साउन । कोशी प्रदेशमा पशुमा लाग्ने ‘लम्पी स्किन’ रोग तीव्ररूपमा फैलिएको छ । जेठको पहिलो सातादेखि फैलिएको महामारीबाट हालसम्म २२ हजार १ सय २२ पशु संक्रमित भएका छन् । रोगका कारण ६३७ पशुको मृत्यु भएको पशुपन्छी तथा मत्स्य विकास निर्देशनालय, कोशी प्रदेशले जनाएको छ ।
निर्देशनालयका अनुसार मृत्यु हुनेमध्ये ६३५ गाई–गोरु र २ भैसी–राँगा रहेका छन् । संक्रमितमध्ये २१ हजार ८९८ गाई–गोरु तथा २२४ भैसी–राँगा छन् । निर्देशनालयका निर्देशक तथा पशु चिकित्सक डा. सुशील अधिकारीका अनुसार महामारी सुरुमा प्रदेशका १० जिल्लामा सीमित थियो । तर, गत हप्ता तेह्रथुममा पनि संक्रमण देखिएको छ ।
सबैभन्दा बढी संक्रमण झापा जिल्लामा देखिएको छ । झापामा १४ हजार ६९२ पशु संक्रमित भएका छन् । त्यसपछि मोरङ, इलाम र सुनसरीमा पनि उच्च दरमा संक्रमण फैलिएको अधिकारीले जानकारी दिनुभयो ।
रोग नियन्त्रणका लागि प्रभावित जिल्लाका तीन लाख २५ हजार ६२ गाईरगोरु तथा भैसी–राँगामा ‘लम्पी स्किन’ विरुद्धको निःशुल्क खोप लगाइएको छ । पशुसेवा विभागले कोशी प्रदेशलाई चार लाख खोप उपलब्ध गराएको छ भने खोप अभियान हाल पनि जारी रहेको अधिकारीले बताउनुभयो ।
गर्मी बढेसँगै रोगको संक्रमण दर बढ्ने चिकित्सकहरू बताउँछन् । लामखुट्टे, भुसुना, झिंगा, किर्ना आदिको टोकाइबाट रोग एक पशुबाट अर्कोमा सर्ने गर्छ । रोग लागेपछि पशुको शरीरमा फोकाहरु निस्कने, ती फोकाहरु फुटेर घाउ हुने र पशु कमजोर हुने चिकित्सकहरूको भनाइ छ ।
Nepali