झापा । शाह वंशका अन्तिम राजा ज्ञानेन्द्र शाह झापा आइपुग्नु भएको छ । उहाँसहितको परिवार करिब १० दिन झापामा बस्ने कार्यक्रम रहेको छ । शाह बुद्ध एयरको काठमाडौं–चन्द्रगढी उडानमार्फत झापा आइपुग्नु भएको हो ।
चन्द्रगढी विमानस्थलबाट उहाँ सिधै दमक नगरपालिका–९ स्थित हिमालयन महालक्ष्मी टि–इस्टेटतर्फ लाग्नुभएको छ, जहाँ शाहको स्वामित्वमा चिया बगान र मिनी दरबार रहेको छ । शाहसँगै कोमल शाह, छोरी प्रेरणा शाहलगायत परिवारका ६ सदस्य पनि झापा आएका छन् ।
विमानस्थलमा बा.२१ च ७३१८, बा.६ च २८२९, बा.प्र.०१–०२७ च ६१७१, बा.१७ च ७३६२, बा.१ झ १४८४, बा.१७ च २६७६, बा.४ च ६९७६ र बा.१ झ ३९१३ नम्बरका आठ वटा गाडीमार्फत सुरक्षाकर्मी र समर्थक पुगेका थिए ।
शाह परिवारलाई विमानस्थलमा भद्रपुर नगरपालिका उपप्रमुख राधा कार्की, नेपाल विद्वत परिषद्का केन्द्रीय अध्यक्ष जीतबहादुर अर्जेल, पूर्वमन्त्री बद्रीप्रसाद मण्डल, पूर्वसहायक मन्त्री टेकनारायण राजवंशीलगायतले स्वागत गरेका थिए । त्यस्तै परिषद उपाध्यक्ष बल्लवप्रसाद दाहाल, मोरङ अध्यक्ष पुष्पराज दाहाल, सुभद्रा गेलाल, ज्वाला दाहाल, पप्पुलाल चौधरी, सन्दिप घिमिरेलगायतले पनि स्वागतमा सहभागी भएका थिए । उपप्रमुख कार्की, राजवंशी, गेलाल र ज्वाला बाहेक अन्य सबै स्वागतकर्ता झापा बाहिरका थिए ।
यसअघि राजा ज्ञानेन्द्र झापा आउँदा राष्ट्रिय प्रजातन्त्र पार्टी (राप्रपा)का नेता–कार्यकर्ताले ठूलो भीडभाड र तामझामका साथ स्वागत गर्ने गर्थे । तर, यसपटक त्यस्तो दृश्य देखिएन । राप्रपा झापा अध्यक्ष केशवप्रसाद ओझाले सो दिन पार्टीको कार्यक्रम सुरुङ्गामा चलिरहेको कारण पनि स्वागतमा कार्यकर्ता नपुगेको बताउनुभयो ।
ओझाले भने, “उहाँ झापा आउने कुरा पार्टीलाई आधिकारिक रूपमा जानकारी दिइएको थिएन । नितान्त पारिवारिक र व्यक्तिगत कामका लागि उहाँ आएको हो । स्वागतमा नजादैमा पार्टीले राजसंस्थाको मुद्दा छाडेको भन्ने होइन ।”
यसअघि जेठको दोस्रो साता शाह परिवार १५ दिनका लागि झापा बसेको थियो । काठमाडौंबाट राजावादी आन्दोलन उत्कर्षमा पुगेको र तीनकुनेमा दुईजनाको ज्यान जाने घटना भएको केही दिनमै शाह परिवार उपत्यका बाहिर निस्किएको थियो ।
Nepali