मेचीनगर । मेचीनगर प्रेस क्लबको आयोजनामा हुन गइरहेको ‘इन्डो–नेपाल मेचीनगर मिडियाकप–२०८२’ को लोगो सार्वजनिक गरिएको छ । मंगलबार प्रेस क्लब मेचीनगरको कार्यालयमा आयोजित कार्यक्रममा लोगो सार्वजनिक गरिएको हो ।
ट्रफी आकारको लोगोमा सबैभन्दा माथि फुटबल राखिएको छ भने फुटबलभित्र मेचीनगरका प्रमुख पर्यटकीय स्थलहरू समावेश गरिएको छ । लोगोको बीच भागमा नेपाल र भारतका झण्डा अंकित छन् । उक्त लोगोले नेपाल–भारतबीचको आपसी सम्बन्धलाई अझ प्रगाढ बनाउने सन्देश प्रवाह गरेको आयोजकले जनाएको छ ।
प्रेस क्लब मेचीनगरका अध्यक्ष प्रकाश पौडेलको अध्यक्षतामा सम्पन्न कार्यक्रममा प्रमुख अतिथि मेचीनगर नगरपालिका–७ का वडाध्यक्ष प्रल्हादमणि ओलीले लोगो सार्वजनिक गरेका हुन् । कार्यक्रममा प्रेस क्लब मेचीनगरका संस्थापक अध्यक्ष सन्तोष आचार्य तथा पूर्व अध्यक्ष ज्ञानेन्द्र निरौलाले मिडियाकपको सफलताको शुभकामना व्यक्त गरे ।
प्रेस क्लब मेचीनगरका उपाध्यक्ष खगेन्द्र घिमिरेले स्वागत मन्तव्य व्यक्त गरेको कार्यक्रममा सचिव प्रविण अधिकारीले सञ्चालन गरेका थिए ।
यही पुस २७ र २८ गते आयोजना हुने मिडियाकपमा नेपालसहित भारतबाट गरी जम्मा ८ वटा पत्रकार टिम सहभागी हुनेछन् ।
प्रतियोगिताको विजेता टिमले नगद ५० हजार रुपैयाँसहित ट्रफी, शिल्ड र प्रमाणपत्र प्राप्त गर्नेछ भने उपविजेता टिमले नगद २५ हजार रुपैयाँ पाउनेछ । सञ्चार क्षेत्रमार्फत पर्यटन प्रवर्द्धन गर्ने उद्देश्यले पहिलो पटक मिडियाकप आयोजना गरिएको आयोजकले जनाएको छ ।
Nepali