भद्रपुर, झापा । आज साँझ करिब ९ :१० बजे, झापाको भद्रपुर नगरपालिका–८ स्थित भद्रपुर (चन्द्रगढी) विमानस्थलमा अवतरणका क्रममा बुद्ध एयरको ATR–72 (फ्लाइट नम्बर 901) विमान दुर्घटनाग्रस्त भएको छ ।
काठमाडौँबाट ५१ जना यात्रु र ४ जना चालक दलसहित भद्रपुरका लागि उडेको उक्त विमान रन–वेमा अवतरण गर्ने क्रममा पूर्वतर्फ ओभररन भई करिब ३०० मिटर अगाडि भासिँदा क्षतिग्रस्त भएको हो ।
दुर्घटनापछि तत्काल उद्धार कार्य सुरु गरिएको र सबै यात्रु तथा चालक दलका सदस्यहरूलाई सुरक्षित रूपमा विमानबाट बाहिर निकालिएको जनाइएको छ । हालसम्म मानवीय क्षतिबारे यकिन विवरण आउन बाँकी रहेको र सम्बन्धमा थप बुझ्ने कार्य भइरहेको छ ।
घटनास्थलमा जिल्ला प्रहरी कार्यालय झापाबाट प्रहरी उपरीक्षक राजन लिम्बुको नेतृत्वमा करिब ७० जनाको प्रहरी टोली खटिएको छ ।
उक्त विमान काठमाडौँबाट साँझ ८:२३ बजे भद्रपुरका लागि उडेको थियो ।
Nepali