मेचीनगर । झापाको मेचीनगर-१३ स्थित छबिलाल मार्गमा निर्माणाधीन प्लमवाल भत्किएको छ । इन्जिनियर र ठेकेदार कम्पनीले त्यस ठाउँको भौगोलिक माटोको सतहको अवस्था नबुझी अन्धाधुन्ध निर्माण गर्दा काम सम्पन्न नहुँदै प्लमवाल भत्किएको हो ।
मेचीनगर वडा नम्बर १३ र नगरपालिका तथा केही सामाजिक व्यक्तित्वको बिशेष पहलमा संघीय सरकारको १ करोड १६ लाख विनियोजित बजेटबाट धमाधम निर्माण भइरहेको १० फुट अग्लो प्लमवाल करिब ६० मिटर भत्किएको छ भने करिब २० मिटर चर्किएको छ ।
माथी ३०, बेस ६० सेन्टिमिटर र २ मिटर अग्लो वाल जमिनमुनिको बेसमै कमजोर ढलान भएका कारण क्षति भएको मेचीनगर १३ का वडाध्यक्ष कृष्णराज सिग्देलले जानकारी दिए । “स्थानीय तहसंग समन्वय गरेको भए त्यस ठाउँको भौगोलिक माटोको सतहको अवस्था बारे निर्माण कम्पनी र इन्जिनियरलाई थाहा हुने थियो । तर त्यसो नहुँदा बनिनसक्दै प्लमवाल भत्किन पुग्यो । कम्तीमा जनप्रतिनिधिसंग समन्वय नगरे पनि नगरका स्थानीय प्राविधिक संग समन्वय गरेको भए पनि त्यस्तो हुने थिएन – अध्यक्ष सिग्देलले भने।”
नवनिर्मित प्लमवाल लोकल इन्फास्टक्चर डेभलपमेन्ट प्रोजेक्ट इटहरी मार्फत मेचीनगर-१० को एसयुएन कन्ट्रक्सन कम्पनीले ठेक्का पाएको थियो । त्यस्तै योजना सम्पन्न गर्न प्रोजेक्टका इन्जिनियर परलाद दाहाल र ठेकेदार कम्पनीका नयन बरालले निर्माण गर्ने जिम्मा लिएका थिए ।
सम्झौंतापछि ठेक्का पाएको कम्पनीले ठेकेदार दिलिप राजबंशीलाई योजनाको काम सम्पन्न गर्न पेटी ठेक्का दिएका थिए । दिलिप राजबंशीले पनि अर्का ठेकेदार अतुल चौधरीलाई पेटी ठेक्का दिएका थिए ।
संघीय सरकारबाट ठेक्का पाएका र ठेकेदारबाट पेटी ठेक्का पाएका ठेकेदारले मनोमानी रुपमा निर्माण गर्दा उक्त क्षति भएको स्थानीयको आरोप छ । ह्युम पाइप राख्नुपर्ने ठाउँमा समेत नराखि सडक निर्माण भैरहेको र डुबानको चिन्ता बढेको स्थानीय बासिन्दा बताउँछन् ।
संघीय सरकारको १ करोड १६ लाखको टेन्डर भएपनि ठेकेदार कम्पनीले कम मूल्य ९६ लाख २४ हजार ४ सय ७९ रुपैयाँ ६ पैसामा योजनाको काम सम्पन्न गर्ने भनी ठेक्का सम्झौंता गरेका थिए । ३३ फुट चौँडाई र ६५० मिटर लम्बाई रहेको बाटोको दुबैतर्फ प्लम वालसहित ग्रावेलका लागि ठेक्का परेको हो । 
बाटोको एकातर्फको प्लमवाल निर्माणपछि अर्को पट्टीको वाल निर्माण सुरु गरेको केही दिनपछि निर्मित वालको ७५ मिटर भाग भत्कियो । भत्किएको उक्त प्लमवाल अहिले ठेकेदार कम्पनीले पुनः निर्माण कार्य सुरू गरेको छ ।असार २५ गते योजनाको काम सम्पन्न गर्ने मिति रहेपनि समयमै काम सम्पन्न नहुने चिन्तामा स्थानीय वासिन्दा छन् ।
Nepali