बिर्तामोडमा महिलालाई घाइते बनाएर साढे ५ लाख बढीको चोरी

बिर्तामोड । बिर्तामोडमा चोरको आक्रमणबाट एक महिला घाइते भएकी छिन् । बिर्तामोड नगरपालिका- ६ स्थित सुगम शान्ति टोलकी २० वर्षीया कृतिका अधिकारी घाइते भएकी छिन् ।

श्रीमान् विष्णुप्रसाद अधिकारी विदेशमा रहेको र गएराति घरको दोस्रो तलाको झ्यालबाट चोर पसेको थाहा पाएपछि उनले प्रतिकार गरेका थिइन् । सोही क्रममा उनको नाकमा सामान्य चोट लागि घाइते भई बेहोस भएकी थिइन् । घरमा एक वर्षीया छोरी नित्यनिसँगै सुतिरहेको अवस्थामा घरमा चोर पसेको उनले थाहा पाइन् ।

उनी बेहोस भएपछि चोरलेदराज फोडेर अन्दाजी तीन तोला सुन, एक तोला चाँदी, अन्दाजी लत्ताकपडा एक लाख रुपैयाँ बराबरको, झर्के थाल–१० थान, बटुका–५ थान, ओपो कम्पनीको मोबाइल–१ थान गरी अन्दाजी ५ लाख ७५ हजार रुपैयाँ बराबरको चोरी गरेर लगेको छ । यता चोरी भएको खबर बिहान थाहा पाए लगतै इलाका प्रहरी कार्यालय अनारमनिको टोली घटनास्थल पुगेको थियो ।

प्रहरीले घटनाको बारेमा अनुसन्धान गरिरहेको छ । घाइते अधिकारीलाई तत्काल उपचारको लागि बिर्तासिटि अस्पतालमा लगेको र सामान्य उपचारपछि घर फर्किसकेकी प्रहरीले जनाएको छ ।