मेचीनगर। झापाको मेचीनगर-८ स्थित “इटाभट्टा फुटबल क्लब”ले प्रथम इटाभट्टा नकआउट जिल्लास्तरीय फुटबल प्रतियोगिताको आयोजना गर्ने भएको छ ।
स्थानीय युवाहरुको चौतर्फी खेलकुद विकासलाई मध्यनजर गर्दै आगामी असोज १२ गतेदेखि १९ गतेसम्म “प्रथम इटाभट्टा नकआउट जिल्ला स्तरीय फुटबल प्रतियोगिता”’ गर्ने भएको आयोजकले बुधबार पत्रकार सम्मेलन मार्फत जानकारी दिएको हो ।
आयोजकको एक टिमसहित जिल्लाका बिभिन्न ८ चर्चित क्लबहरू बिच प्रतियोगितामा प्रतिस्पर्धा हुनेछ । प्रतियोगिताको सबै प्रक्रिया पूरा गरीसकेको आयोजक इटाभट्टा फुटबल क्लबका अध्यक्ष मनकुमार लिम्बुले जानकारी दिए । उनका अनुसार १५ लाख खर्च अनुमान गरिएको उक्त प्रतियोगितामा प्रथम हुने टिमलाई १ लाख १ हजार १ सय ११ रुपैयाँ र दोस्रो हुनेलाई ५१ हजार १ सय ११ रुपैयाँ नगदसहित ट्रफि तथा प्रमाणपत्र वितरण गरिनेछ ।
प्रतियोगितामा मेचीनगर-८ वडा कार्यालय सह-आयोजक रहेको छ । मेचीनगर-८ का अध्यक्ष गिरिराज धमलाले युवाको चेतनाको विकाससंगै शारीरिक र बौद्धिक विकासका लागि पहिलो पटक जिल्लास्तरीय फुटबल प्रतियोगिता गर्न लागिएको बताए । 
केही दिन अघि दर्ता प्रक्रिया पूरा गरी प्रतियोगिताको तयारी गरेकाले स्थानीय उद्योगी-ब्यवसायी एवम् संघसंस्थाबाट आर्थिक सहयोगको अपेक्षा गरिएको मेचीनगर ८ का वडा सदस्य एबम् खेलकुद संयोजक बिष्णु भट्टराईले जानकारी दिए । उनले यस प्रतियोगिता सम्पन्न गर्न वडा कार्यालयले पनि आवश्यक बजेट बिनियोजन गर्ने बताए ।
प्रतियोगिता मेचीनगर-८ स्थित वन बाटीकामा सञ्चालन हुने जनाइएको छ । आज आयोजित पत्रकार भेटघाट कार्यक्रममा क्लबका अध्यक्ष, मेचीनगर ८ का वडाध्यक्ष, वडासदस्य, प्रेस क्लब मेचीनगर अध्यक्ष डम्बर बराल, आयोजक क्लबका उपाध्यक्ष रमेश धिमाललगायत मेचीनगरका सक्रिय सञ्चारकर्मी तथा आयोजक समितिका सदस्यहरूको उपस्थिति रहेको थियो । पत्रकार भेटघाट कार्यक्रमको सञ्चालन सचिव रामकुमार गिरीले गरेका थिए ।
भिडियो हेर्नुहोस्
Nepali