झापा । बिर्तामोडको क्युएफएक्स सिनेमा हलमा सोमबार दर्शकहरू ‘१२ गाउँ’ फिल्म हेरिरहेका बेला सरप्राइज भए जब पर्दामा देखिएका कलाकारहरू अचानक रियल लाइफमा उनीहरूबीच उपस्थित भए। अभिनेता बिराज भट्ट, अभिनेत्री न्यान्सी खड्का लगायतका निर्माण टोलीले दर्शकलाई तिहारको शुभकामना दिँदै उपस्थित भएर दर्शकलाई धन्यवाद प्रकट गरे। बिराजले फिल्मको लोकप्रिय डाइलग “चट्टै होइन, चैट चैट चैट” लाई लाइभ प्रस्तुत गर्दा दर्शकहरू उत्साहित बने।
फिल्म हेर्न आएका दर्शकले विशेष रूपमा समीर भट्टलाई खोज्दै “समीर भट्ट खोइ, छोरा चाहियो छोरा” भनेर हुटिङ गरे, जसले उत्साहको माहोल थप बढायो। फूलपातिको दिन रिलिज भएको ‘१२ गाउँ’ १९ दिन बितिसक्दा पनि दर्शकको माया उस्तै पाउँदै आएको छ। सोमबार १ बजेको शोमा एक शो हाउसफुल रह्यो भने अर्को शोमा पनि दर्शकको बाक्लो उपस्थिति थियो।
पत्रकारहरूसँगको भेटमा बिराजले ‘१२ गाउँ’ को दोस्रो भाग छिट्टै ल्याउने बताए। सुरुमा हलहरूले कम शो दिए पनि दर्शकको मायाले त्यो परिस्थिति उल्टाइदिएकोमा खुशी व्यक्त गर्दै बिराजले भने, “दर्शकको यो मायाले हामीलाई थप जिम्मेवार बनाएको छ।” 
अभिनेत्री न्यान्सी खड्काले आफू विराटनगरबाट भएको बताउँदै पूर्वको माया पाउँदा निकै उत्साहित भएको बताइन्। उनका अनुसार छोटो भूमिकामा अभिनय गर्दा पनि दर्शकले यति धेरै मन पराउँदा आश्चर्य लागेको छ। कार्यक्रममा नेपाल चलचित्र संघका केन्द्रीय सदस्य मिजास पोखरेल र क्युएफएक्सका म्यानेजर केदार बस्नेतले टिमलाई स्वागत गरे।
‘१२ गाउँ’ मा सोनु चन्द्रपाल, दिया मास्के, मुरलीधर, सनिशा भट्टराई, नरेन खडका, स्टन्ट सिल्भा, कान्जी कोइराला, सुलेमान शंकर इकु, कालु राना लगायतका कलाकारहरूको पनि अभिनय रहेको छ।
Nepali