प्रविण अधिकारी
मेचीनगर । नेपाली महिला राष्ट्रिय टिमकी पुर्व कप्तान रुविना क्षेत्री र रङ्गकर्मी एवम् जातिय छुवाछुत विरुद्धकी अभियान्ता कविता नेपाल “उत्कृष्ट दस युवा पुरस्कार”बाट सम्मानित भएका छन्।
राष्ट्रिय महिला क्रिकेट टिमकी पुर्व कप्तान रूविना क्षेत्री र अभियान्ता कविता नेपाललाई नेपाल जेसीजले आफ्नो ५१ औँ राष्ट्रिय महाधिवेशनको उद्घाटन समारोहमा “उत्कृष्ट युवा पुरस्कार”बाट सम्मानित गरिएको हो ।
हिजो शनिबार इटहरीमा शुरु भएको जेसिज राष्ट्रिय सम्मेलनका प्रमुख अतिथि एवम् प्रधानमन्त्री केपी शर्मा ओली, कोशी प्रदेशका मुख्यमन्त्री हिक्मतकुमार कार्की र नेपाल जेसीजका राष्ट्रिय अध्यक्ष रबिन कुमार पोखरेल लगायतले रुविना र कवितालाई नगद २० हजार सहित सम्मानपत्रद्धारा सम्मानित गरेका हुन् ।
सुरूङ्गा जेसीजको सिफारिसमा खेलको माध्यमबाट राष्ट्रलाई पुर्याएको योगदानको कदर गर्दै क्षेत्रीलाई उत्कृष्ट युवा पुरस्कार प्रदान गरिएको हो । क्षेत्री नेपाली महिला क्रिकेट टोलीकी पुर्व कप्तान समेत हुन् भने अहिले पनि टिममा महत्वपुर्ण र अनुभवि खेलाडीका रुपमा रहँदै आएकी छिन्।
क्षेत्रीले महिला टी-२० क्रिकेटमा एकै ओभरमा ५ लगातार विकेट लिने अद्वितीय कीर्तिमान बनाएकी छिन्। यो उपलब्धि हासिल गर्ने उनी विश्वकै पहिलो महिला क्रिकेट खेलाडी हुन्। साथै उनी नेपाली टि ट्वान्टि क्रिकेटमा शतक प्रहार गर्ने पहिलो नेपाली महिला खेलाडी पनि हुन्। उनले मलेसियामा आयोजित एसिसी उमन्स प्रिमियर कपमा माल्दिभ्स विरुद्ध ५४ बलमा शतक प्रहार गरेकी थिइन् ।
त्यस्तै नेपाललाई जातिय छुवाछुत अभियान्ता तथा सामाजिक परिवर्तनको क्षेत्रमा योगदान पुर्याएको कदर गर्दै ’सामाजिक न्याय र समाजोत्थान’ बिधामा सम्मान गरिएको हो । बाहुण्डागी जेसीजको सिफारिसमा नेपाललाइ सम्मान गरिएको हो । बाहुण्डागीले पहिलो पटक यो सिफारिस गरेको हो । विशेषगरी रङ्गमञ्चमा उनको उत्कृष्ट प्रस्तुति रहँदै आएको छ। समाजमा जातीय छुवाछूत विरुद्ध उनको ठुलो योगदान रहँदै आएको छ।
जेसीजले प्रत्येक वर्ष उत्कृष्ट योगदान पु¥याउने १० युवालाई “उत्कृष्ट युवा पुरस्कार”बाट पुरस्कृत गर्दै आएको छ ।
Nepali