मेचीनगर । झापाको मेचीनगर -४ स्थित बाहुनडाँगीमा भोलिदेखि इण्डो–नेपाल टी–२० नकआउट क्रीकेट प्रतियोगिता हुने भएको छ । बाहुनडाँगी युवा क्लबको आयोजनामा हुन लागेको उक्त प्रतियोगिता सरस्वती माविको खेल मैदानमा हुने र प्रतियोगितामा नेपाल र भारतका गरी १२ टिम सहभागी हुने आयोजकले जनाएको छ।
आज प्रेस क्लब मेचीनगरको कार्यालय इटाभट्टामा पत्रकार सम्मेलन गर्दै आयोजक बाहुनडाँगी युवा क्लबले प्रतियोगिताबारे जानकारी गराएको हो । प्रतियोगिताको संरक्षक ४ नम्बर वडा कार्यालय रहेको छ भने प्रायोजकमा साना किसान कृषि सहकारी संस्था रहेको छ।
क्लबका सदस्य एवम् क्रीकेट प्रतियोगिताका संयोजक प्रविण भण्डारीका अनुसार प्रतियोगितामा भारतका २ र नेपालका १० वटा टिमसहित १२ वटा टिम सहभागी हुनेछन्, भने विजेताले ५० हजार नगद सहित ट्रफी र प्रमाणपत्र प्राप्त गर्नेछन् भने उपविजेता टिमले ३० हजार, ट्रफी, मेडल र प्रमाणपत्र प्राप्त गर्नेछ।
प्रतियोगितामा म्यान अफ द म्याच, म्यान अफ द सिरिज र प्रतियोगिताका सर्वोत्कृष्ट खेलाडीलाई समेत पुरस्कृत गरिने आयोजकले जनाएको छ। प्रतियोगिता भोलि २१ गते बुधबारदेखि आगामी चैत ४ गतेसम्म हुने छ । उद्घाटन खेलमा प्रमुख अतिथिका रुपमा मेचीनगर–४ का वडाध्यक्ष अर्जुनकुमार कार्कीको उपस्थिति रहने र खेलको उद्घाटन समेत अध्यक्ष कार्किले गर्नेछन् ।
वि. स. २०४० सालमा स्थापना भएको क्लबले समाजमा विभिन्न सामाजिक कार्य सँगै खेलकुदका गतिविधिहरु गर्दै आएको छ । प्रतियोगिता गर्नुको मुख्य उदेश्य क्रिकेट एकाडेमी सञ्चालन गर्ने रहेको समेत आयोजकले जनाएको छ ।
Nepali