झापा । विप्लव नेतृत्वको नेकपाले झापासहित देशभर जन प्रदर्शन गर्ने भएको छ। पार्टीको हालै सम्पन्न पोलिटब्युरो बैठकले जन प्रदर्शन सहित विभिन्न संघर्षका कार्यक्रम सार्वजनिक गरेको छ।
आगामी चैत्र २४ गते झापा सहित देशभरका ७७ वटै जिल्लामा जन-प्रदर्शन गर्ने, चैत्र २७ गते देशभरका पालिका स्तरमा मसाल जुलुस गर्ने र वैशाख ५ गते सम्पुर्ण जिल्लाहरुमा कोण सभा गर्ने कार्यक्रम सार्वजनिक गरेको छ।
यसैबीच नेकपा झापाले आज पार्टी कार्यालय विर्तामोडमा पार्टी सचिवालय बैठक बस्दै पार्टीको केन्द्रीय कार्यक्रमहरु भव्य रुपमा सम्पन्न गर्ने निर्णय गर्दै तयारीमा जुटेको छ।
पार्टीका जिल्ला इन्चार्ज सुमनसिंह सी को नेतृत्वमा बसेको बैठकले सचिवालय सदस्यहरुलाई विभिन्न जिम्मेवारी हस्तान्तरण गर्दै कार्यक्रमको भव्य तयारी भएको जानकारी दिएका छन्। उनले यो प्रदर्शन प्रतिगामी तत्वहरुको विरुद्ध र अग्रगमन तर्फ देशलाई अगाडि बढाउने उद्धेश्यका साथ आयोजना गरिएको जानकारी दिए।
उनले गणतन्त्र बाट प्राप्त उपलब्धिहरुको रक्षा गर्दै अब समाजवादमा जानू मात्रै अन्तिम विकल्प रहेको बताएका छन्। उक्त कार्यक्रममा उपस्थित हुनका लागि आम झापा बासिहरुलाई आग्रह गरेका छन्।
Nepali