धुलाबारी, झापा । पासाङ ल्हामू ब्याडमिन्टन क्लब, मेचीनगर–१० को आयोजनामा ‘प्रथम मेचीनगर वडा स्तरीय ब्याडमिन्टन प्रतियोगिता’ भोलिदेखि (शुक्रबार) धुलाबारीमा सुरु हुँदैछ।
‘खेल खेलौं, स्वस्थ बनौं’ भन्ने नारासहित सञ्चालन हुने दुई दिने प्रतियोगिता धुलाबारी टाउनहलमा हुनेछ। क्लबका अध्यक्ष कमल कुमार राउतका अनुसार प्रतियोगितामा मेचीनगरका विभिन्न वडाबाट १८ वटा सिनियर टिम सहभागी हुनेछन्। साथै, ५ वटा जुनियर टिमले पनि प्रतिस्पर्धा गर्ने खेल संयोजक विष्णु तामाङले जानकारी दिए।
प्रतियोगितामा जुनियरतर्फका विजेतालाई ट्रफी, प्रमाणपत्र तथा पुरस्कार प्रदान गरिनेछ। सिनियरतर्फ प्रथम हुने टिमले ११ हजार रुपैयाँ नगद, ट्रफी र प्रमाणपत्र प्राप्त गर्नेछ भने दोस्रोले ७ हजार र तेस्रोले ५ हजार रुपैयाँ नगद पुरस्कार पाउनेछ।
खेलमा सहभागी हुन मेचीनगर नगरबासी वा त्यहाँ कार्यरत कर्मचारी हुनुपर्ने शर्त राखिएको छ। प्रतियोगिता ब्याडमिन्टनको अन्तर्राष्ट्रिय नियमअनुसार सञ्चालन गरिने आयोजक समितिका सचिव युवराज चुडालले बताए।
प्रतियोगिताको मुख्य प्रायोजक वडा नं. १० कार्यालय रहेको छ भने वडा नं. ९ सहप्रायोजकको रूपमा रहेको छ। साथै, राष्ट्रिय वाणिज्य बैंक, नेपाल बैंक र ग्लोबल आइएमई बैंक धुलाबारी शाखा सहयोगी संस्थाका रूपमा रहेका छन्। मेडिकल पार्टनरको रूपमा हलेसी मेडिकल हलले साथ दिएको छ।
प्रतियोगिताको उद्घाटन कार्यक्रम शुक्रबार बिहान ७ बजे सुरु हुनेछ भने समापन शनिबार गरिनेछ। प्रतियोगिता भव्य रूपमा सम्पन्न गर्न सबै तयारी पूरा भइसकेको आयोजक समितिले जनाएको छ।
Nepali