मेचीनगर, झापा । प्रहरीले झापाको मेचीनगर–६ स्थित काँकरभिट्टा बसपार्कबाट हतियार सहित एक भारतीय नागरिकलाई नियन्त्रणमा लिएको छ।
मंगलबार साँझ ७:२० बजे इलाका प्रहरी कार्यालय काँकरभिट्टाबाट खटिएको टोलीले प्राप्त गोप्य सूचनाको आधारमा भारतको पश्चिम बङ्गाल, दुर्गानगर सिलिगुडी निवासी अन्दाजी ३५ वर्षीय जय प्रकाश कुमार पाठकलाई नियन्त्रणमा लिएको हो।
पाठक सवार WB 70 G 3232 नम्बरको TUV300 मोडलको कार चेकजाँच गर्दा चालक सिटमुनि लुकाइएको अवस्थामा ‘STAR RX (IN XAMPL CO2 001907 4.5 MM) MAKE IN INDIA’ लेखिएको म्याग्जिनसहितको कालो रंगको एयर पेस्तोल जस्तो देखिने एक थान हतियार फेला परेको प्रहरीले जनाएको छ। 
उक्त पेस्तोलमा प्रयोग हुने ५ थान एयर बुलेट जस्तो देखिने गोलीहरू म्याग्जिनमा भेटिएको जनाइएको छ। त्यसैगरी सवारी साधनको चालक सिटको बायाँपट्टि दुवै साइडमा लुकाएर राखिएको अवस्थामा दुई थान खुकुरी पनि बरामद गरिएको छ।
पाठकको साथबाट REDMI र SAMSUNG कम्पनीका गरी दुई थान मोबाइल, परिचय खुल्ने कागजातहरू र गाडीको आरसी बुकसमेत फेला परेको प्रहरीले जानकारी दिएको छ।
पक्राउ परेका जय प्रकाश कुमार पाठकलाई हाल इलाका प्रहरी कार्यालय काँकरभिट्टामा राखी थप अनुसन्धान भइरहेको प्रहरीले जनाएको छ। 
Nepali