मेचीनगर । काँकरभिट्टा खानेपानी उपभोक्ता तथा सरसफाइ संस्था अब डिजिटल स्मार्ट प्रणालीतर्फ अगाडि बढेको छ। उपभोक्तालाई छिटो, छरितो र सहज सेवा दिन आइतबारदेखि मोबाइल एप, वेबसाइट र जीआईएस (भौगोलिक सूचना प्रणाली) प्रविधि औपचारिक रूपमा सुरु गरिएको हो।
कार्यक्रमको उद्घाटन मेचीनगर नगरपालिकाका प्रमुख गोपालचन्द्र बुढाथोकीले गरे। उनले काँकरभिट्टा खानेपानी प्रणाली अब नमूनाका रूपमा विकसित हुँदै गएकाले डिजिटल प्रविधिको प्रयोग अपरिहार्य भएको बताए। “अब सबैले प्रविधिलाई सदुपयोग गर्नुपर्छ,” उनले भने, “मेचीनगरलाई पनि ९० प्रतिशतसम्म प्रविधिमैत्री बनाउने तयारी गरिएको छ।”
संस्थाका अध्यक्ष रोहितकुमार बुढाथोकीले घरघरमा धारा कहाँ छ, कस्तो अवस्थामा छ, पाइप कसरी पुगेको छ, ट्याङ्कीको अवस्था, संस्थाको इतिहास र दस्तावेजजस्ता सम्पूर्ण जानकारी मोबाइल एपमार्फत हेर्न सकिने जानकारी दिए। उनले भने, “पाइपलाइनको डिजिटल म्यापिङसहित सम्पत्ति व्यवस्थापन गर्न जीआईएस, एप र वेबसाइट सुरु गरिएको हो।” 
चार महिनाअघि दियालो टेक्नोलोजी प्रालिले प्रविधि विकासको जिम्मेवारी लिएको थियो। कार्यक्रममा संस्थाका लागि सफ्टवेयर विकास गरेको दियालो टेक्नोलोजीका बजार प्रमुख रोशन गौतमले उपभोक्ताले अब मोबाइल एपमार्फत रिडिङ, खपत युनिट, स्टेटमेन्ट, बिल, तालिका, कम्प्लेन लगायत सबै सुविधा सजिलै हेर्न सक्ने बताए।
उनका अनुसार संस्थाको ३६५ किलोमिटर क्षेत्रमा फैलिएका ८ हजार ४ सय उपभोक्ताको डेटा संकलन गरिएको छ। मोबाइल एप लागू भएसँगै खानेपानी तथा सरसफाइ क्षेत्रमा थप सुधार आउने उपभोक्ताको अपेक्षा छ।
कार्यक्रममा उपाध्यक्ष गोविन्द गिरीले स्वागत मन्तव्य राखेका थिए भने सचिव विशाल तामाङले सञ्चालन गरेका थिए।
Nepali