मेचीनगर। झापाको मेचीनगर नगरपालिका–९ खुट्टिडाँगीस्थित भित्री सडक खण्डमा पारिजात पब्लिक स्कुलको भ्यान अनियन्त्रित भई दुर्घटनामा पर्दा चालकसहित २१ जना घाइते भएका छन्। बिहान करिब १० बजे मागुरमाडीबाट विद्यालयतर्फ जाँदै गरेको मे.१ ज. ३१०७ नम्बरको भ्यान दुर्घटना भएको हो।
दुर्घटनामा परी झापा मेचीनगर–९ का ४५ वर्षीय चालक गणेश श्रेष्ठसहित विद्यालयका शिक्षक र विद्यार्थीहरू घाइते भएका हुन्। श्रेष्ठको टाउकोमा चोट लागेको छ र उनको अवस्था मध्यम रहेको बताइएको छ। उनीसहित केही घाइतेको उपचार बिर्तामोडस्थित विएण्डसी अस्पतालमा भइरहेको छ।
दुर्घटनामा परी सबिस्का राई (६ वर्ष), समिरा बिसुङ्खे (४ वर्ष), संयोग बिसुङ्खे (१२ वर्ष), अंगु बराई मगर (९ वर्ष), र विद्यालयकी शिक्षिका प्रिति सिवा (२३/२४ वर्ष) सहित ७ जनालाई गम्भीर चोट लागेकाले B&C अस्पताल रेफर गरिएको छ। बाँकी विद्यार्थीहरूको उपचार धुलाबारीस्थित आम्दा अस्पतालमा भइरहेको छ। अधिकांश विद्यार्थीहरूको अवस्था सामान्य छ।
घाइतेहरूमध्ये टाउको, हात, वा शरीरका विभिन्न भागमा सामान्य चोटपटक लागेको जनाइएको छ। दुर्घटनामा परी बोल्न सक्ने अवस्थाका अधिकांश बालबालिकालाई प्रारम्भिक उपचारपछि घर पठाइएको छ।
घटनास्थलमा इलाका प्रहरी कार्यालय धुलाबारीका प्रमुख पाण्डब कुमार राजवंशीको नेतृत्वमा प्रहरी टोली खटिएको थियो। दुर्घटनास्थल सो कार्यालयबाट करिब ४ किलोमिटर उत्तरतर्फ पर्छ।
प्रहरीका अनुसार चालक गणेश श्रेष्ठसँग सवारी चालक अनुमतिपत्र (स.चा.अ.पत्र) रहेको र उनी मापसे (मादक पदार्थ सेवन) नगरेको पुष्टि भएको छ।
प्रहरीले घटनाको थप अनुसन्धान गरिरहेको जनाएको छ।
Nepali