झापा । झापाको बिर्तामोडस्थित यातायात व्यवस्था कार्यालयमा सेवा लिन आउने नागरिक सधैं सास्ती खेप्न बाध्य छन्। अव्यवस्थित लाइन, बिचौलियाको जालो, कर्मचारीको ढिलासुस्ती त सामान्यजस्तै भइसकेको यस कार्यालयमा अहिले स्वास्थ्य परीक्षणमा समेत दोब्बर शुल्क असुलिएको गुनासो तीव्र भएको छ।
सवारी चालक अनुमतिपत्र (लाइसेन्स) लिन आउने सेवाग्राही बिहान सबेरै लाइन लागे पनि कार्यालयमा समयमै काम हुँदैन, प्रक्रिया पनि छरितो छैन। अहिले त स्वास्थ्य परीक्षणका नाममा बढी शुल्क असुलिँदै सेवाग्राही आक्रोशित छन्। 
यसअघि निजी क्षेत्रमार्फत स्वास्थ्य परीक्षण गर्दा १५० रुपैयाँ मात्र तिर्नु पर्नेमा कोशी प्रदेश सरकारले सरकारी कार्यालयमार्फत परीक्षण सुरु गरेपछि शुल्क ठीक दोब्बर बढाएर ३०० रुपैयाँ लिएको छ। सेवाग्राही क्रिफान नेम्बाङ्ग भन्छन्, “नागरिकलाई सहज सेवा दिनुभन्दा ढाड सेक्ने काम मात्र भइरहेको छ।” अर्का सेवाग्राही मेराज मियाले भने, “निजी मेडिकलले अनफिट देखिए शुल्क फिर्ता गर्थे, सरकारले त फिर्ता गर्ने व्यवस्था नै छैन।”
त्यस्तै, भौचर शुल्क तिर्न क्यूआर स्क्यान मार्फत ५०० रुपैयाँ बुझाउनुपर्ने व्यवस्था भए पनि कार्यालयको क्यूआर जानाजानी नचलाइ बिचौलियामार्फत बाहिर ६५० रुपैयाँ असुलिने गरिएको आरोप छ। सेवाग्राही राम घतानीका अनुसार, “कर्मचारी र बिचौलियाको मिलेमतोमा खुलेआम लुट हुँदैछ।”
गुनासा चर्किएपछि कार्यालय प्रमुख प्रेमप्रसाद सापकोटाले समस्या नभएको दाबी गर्दै स्वास्थ्य परीक्षणलाई अझ व्यवस्थित बनाउन सरकारी मातहतमा ल्याइएको बताए। तर, सेवाग्राही भने शुल्क बढाइ आर्थिक बोझ थोपारिएको भन्दै आक्रोशित छन्।
झापाको यातायात कार्यालयमा भइरहेको मनपरी असुलीले सेवाग्राहीको विश्वास मात्र कमजोर बनाएको छैन, सवारी अनुमति प्रक्रिया नै बदनाम बनाएको छ। यस तर्फ सम्बन्धित निकायले तत्काल ध्यान दिनुपर्ने देखिन्छ।
Nepali