इलाम, साउन २८ — अविरल वर्षाका कारण इलाम जिल्लाका विभिन्न स्थानमा पहिरो खस्दा भित्री सडकहरू अवरुद्ध भएका छन्। यस्तै, एक स्थानमा घर भत्किँदा दुई जना सामान्य घाइते भएका छन्।
आज बिहान करिब ७:३० बजे फाकफोकथुम गाउँपालिका–१ पंचेवा स्थित आमचोक–घुरमिसे–पञ्चमी हुँदै राँके–इलाम जोड्ने भित्री कच्ची सडकमा लेदो सहितको पहिरो खस्दा यातायात पूर्ण रूपमा रोकिएको हो। घटनास्थलमा इलामको प्रजिअमचोकबाट प्रहरी टोली खटिई अवरोध हटाउने कार्यका लागि समन्वय भइरहेको प्रहरीले जनाएको छ।
गत राति माई नगरपालिका–९ सोक्तिमस्थित इलाम–बिर्तामोड भित्री सडक खण्डमा रुखसहितको पहिरो खसेको छ। यस्तै, इलाम नगरपालिका–११ सोयाङको गोलाखर्क–बिर्तामोड जाने केचना–कंचनजङ्गा फास्ट ट्र्याक सडक खण्डमा पनि पहिरोका कारण आवागमन अवरुद्ध भएको छ। दुवै स्थानमा स्थानीय प्रहरी टोलीले अवरोध हटाउने काम गरिरहेको छ।
यसैबीच, सुर्योदय नगरपालिका–६ हर्कटेमा केशर कटुवालको घरमाथिबाट पहिरो खस्दा घर जोखिममा परेको छ, तर मानवीय वा पशु क्षति भने भएको छैन।
आज बिहान करिब ४ बजे इलाम नगरपालिका–९ गोलबस्तीस्थित राकेश थापा मगरको जिर्ण घर वर्षाका कारण भत्किँदा त्यहाँ डेरा गरी बस्ने सुर्योदय नगरपालिका–५ समालबुङकी ३५ वर्षीया भावना सुब्बा र उनकी १४ वर्षीया छोरी अनुस्का सुब्बा सामान्य घाइते भएका छन्। उनीहरूको जिल्ला अस्पताल इलाममा उपचारपछि बिहान ७ बजे डिस्चार्ज गरिएको प्रहरीले जनाएको छ।
भित्री सडक अवरुद्ध हुँदा स्थानीय आवागमन प्रभावित भएको छ। वर्षा अझै जारी रहेकाले थप जोखिम रहन सक्ने चेतावनी स्थानीय प्रशासनले दिएको छ।
Nepali