झापा – मेचीनगरका मिलन राजवंशीले आजदेखि नेपालको सबैभन्दा होचो स्थान, कचनकवल स्तम्भबाट ताप्लेजुङको पाथिभरा पुग्ने एकल साइकलयात्रा सुरु गरेका छन्।
आज बिहान साइकलयात्री राजवंशीलाई कचनकवल गाउँपालिकाका अध्यक्ष कालेन्द्रप्रसाद सिंह राजवंशी, उपाध्यक्ष नवराज भट्टराई, कचनकवल–४ का वडा अध्यक्ष नुरजामा मिया, भद्रपुर साइकल क्लबका अध्यक्ष जीवनकुमार श्रेष्ठलगायतले विदाई गरेका थिए। 
कार्यक्रम संयोजक कर्णबहादुर राजवंशीका अनुसार, सो अवसरमा कचनकवलको पहिचान झल्कने सामग्री र टिसर्ट प्रदान गरी साइकलयात्रीलाई शुभकामना दिइएको थियो।
१९ वर्षीय राजवंशीले “छोड लागुपदार्थ, जोड साहस, बढ अगाडि निरन्तर” भन्ने नारासहित नेपालको होचो भूभाग चिनाउने र युवालाई कुलतबाट बचाउने सन्देश दिने उद्देश्यले यो यात्रा सुरु गरेको बताए।
राजवंशी झापामा हुने साइकल प्रतियोगिताका प्रथम हुने खेलाडी हुन्। उनी तीव्र गतिमा अप्ठ्यारा बाटो तथा उकालो–ओरालोमा पनि सजिलै साइकल चलाउन सक्छन्।
यात्राको पहिलो दिन उनले इलामसम्म पुग्ने र भोलिपल्ट फिदिमतर्फ प्रस्थान गर्ने योजना बनाएका छन्। तेस्रो दिन फिदिमबाट सिंहपुरसम्म र चौथो दिन ठुलो फेदीसम्म यात्रा गर्ने तयारी रहेको उनले जनाए। 
Nepali