प्रविण अधिकारी
झापा । महासचिव नेत्र विक्रम सी “विप्लव” सहित नेपाल कम्युनिस्ट पार्टीका नेता तथा कार्यकर्ता यतिबेला झापा सहित देशैभर उत्पादनमा होमिएका छन्।
कम्युनिस्ट पार्टीका नेताकार्यकर्ताले अनिवार्य श्रम गर्नुपर्ने र आत्मनिर्भरताका लागि उत्पादन सँग जोडिनुपर्ने पार्टीको निति अन्तर्गत विप्लव नेतृत्वको नेपाल कम्युनिस्ट पार्टीका नेता कार्यकर्ता यतिबेला राजनीतिक गतिविधि स्थगित गरेर श्रममा होमिएका हुन्। 
यो समय खेती लगाउने समय पनि भएकोले उनिहरु यतिबेला सहर बजारमा नभएर खेत- खेतमा भेटिने गरेका छन्। यतिबेला झापामा पनि विप्लव नेकपाका नेताकार्यकर्ता धान रोप्न व्यस्त छन्। पार्टीका जनवर्गीय संगठनहरु समेत यतिबेला उत्पादनमा जोडिएका छन्।
झापामा मात्रै ९ बिघा जमिनमा धान रोप्ने लक्ष्य रहेको पार्टीका जिल्ला सचिव सञ्जय सी ले जानकारी दिएका छन्। पार्टीले शुरु गरेको अनिवार्य श्रम नितिलाई अवलम्बन गर्दै यतिबेला पार्टीका जिल्ला इन्चार्ज सुमनसिंह सी को नेतृत्वमा सिंगो पार्टी पंक्ति नै धान रोप्न व्यस्त छ। 
नेपाल कम्युनिस्ट पार्टीले झापाको शिवसताक्षी , गौरादह, गौरीगन्ज र भद्रपुरलाई आधार बनाएर विभिन्न व्यक्तिहरुको जमिन भाडामा लिएर खेती गरिरहेको छ । यता युवा संगठन नेपालका केन्द्रीय महासचिव सुवास सी को नेतृत्वमा आज बुधबार युवा संगठनले झापामा डेढ बिघामा रोपाइँ सम्पन्न गरेको छ।
कम्युनिस्ट पार्टीको नेताकार्यकर्ताले भाषण गरेर मात्रै नहुने र अनिवार्य उत्पादनसँग जोडिनुपर्ने नेपाल कम्युनिस्ट पार्टीको निति रहेको छ। 
