मेचीनगर। झापाको मेचीनगर- ६ स्थित काँकरभिट्टा माविको खेलमैदानमा जारी सांगीतिक महोत्सव तथा रमाइलो मेला २०८१ को आज तेस्रो दिन शुक्रबार राष्ट्रिय ख्यातिप्राप्त कलाकार प्रिती आलेको प्रस्तुति रहनेछ ।
काँकरभिट्टा भेट्रान्स फुटबल क्लबले आयोजना गरेको आयोजित महोत्सवमा दैनिक राष्ट्रिय ख्यातिप्राप्त कलाकारहरूको प्रस्तुति रहनेछ । यसै सिलसिलामा आज पछिल्लो समयकी चर्चित गायिका प्रिती आले आउने भएकी हुन् ।
काँकरभिट्टा खेलमैदानमा आगामी असोज १५ गतेसम्म सञ्चालन हुने महोत्सवको दोस्रो दिन हिजो बिहीबार चर्चित गायिका अस्मिता अधिकारीले आफ्नो सुपरहिट गीत गाउँदै दर्शकलाई भरपुर मनोरञ्जन प्रदान गरेकी थिइन् । 
आयोजक काँकरभिट्टा भेट्रान्स फुटबल क्लबका महासचिव सुन्दर बस्नेतका अनुसार प्रत्येक दिन स्थानीय कलाकारको साथमा राष्ट्रिय ख्यातिप्राप्त कलाकारहरूको प्रस्तुति रहने छ । त्यस्तै साँस्कृतिक कार्यक्रमको सञ्चालन पुर्वको लोकप्रिय उद्घोषिका भूमिका सुब्बा फ्याकले गर्नेछिन् ।
महोत्सवमा रोटेपिङ्गलगायत विभिन्न मनोरञ्जनात्मक खेलसामाग्रीहरु समेत राखिएको छ ।
Nepali