पाँचथर। पाँचथरमा बाढीपहिरोमा परी ५ जनाले ज्यान गुमाएका छन् । जिल्ला प्रहरी कार्यालय पाँचथरका अनुसार हालसम्म ६ जना बेपत्ता र एक जनाको उद्धार गरिएको छ ।
पहिरोमा परी फिदिम ४ मा बसोबास गर्दै आएकी २४ वर्षीया सपना शेर्पा, ५ वर्षीया डोल्मा शेर्पा, फिदिम ८ का ८२ वर्षीया पश्चिमा शेर्पा, फिदिम २ मजिटेकी ३५ वर्षीया रञ्जना राई र फिदिम १ का ५० वर्षीय गोपी नेपालीको मृत्यु भएको प्रहरी नायव उपरीक्षक हेमन्त भण्डारीले बताए ।
फिदिम २ की मृतक रञ्जना राईका छोरा विपन राईलाई घाइते अवस्थामा उद्धार गरिएको उनको भनाइ छ । फालेलुङ– ५ की ३६ वर्षीया कमला राई, फिदिम–१ का कृष्ण दास, उनकी श्रीमती कमला दास, धनकुमार तुम्बापो, राजेश तुम्बापो र उनकी श्रीमती सरस्वती तुम्बापो बेपत्ता भएका छन् । फालेलुङ– ५ मा मात्रै बाढी पहिरोबाट ५ घर बगेका छन् ।
फालेलुङ– ६ र ५ लाई जोड्ने मुवा खोला पुल, फिदिम १ र ११ लाई जोड्ने फेमे खोला पुल, फिदिम ४ हिलिहाङ ७ लाई जोड्ने मेची राजमार्गको हेवा खोला पुल बाढीले बगाएको छ । जिल्लाको मिक्लाजुङ गाउँपालिका र फिदिम नगरपालिकाका विभिन्न स्थानमा पहिरो गएको छ । पहिरोले पु¥याएको क्षतिको यकिन विवरण सङ्कलन गर्न बाँकी रहेको प्रहरीले जनाएको छ ।
