विर्तामोड । झापाको कमल गाउँपालिका -५ रवि पेट्रोल पम्प स्थित पुर्वपश्चिम राजमार्गमा यात्रुबाहक बसको ठक्करबाट मोटरसाइकल चालकको घटनास्थलमै मृत्यु भएपछि अहिले पूर्व–पश्चिम राजमार्गमा तनावग्रस्त बनेको छ।
दमकबाट विर्तामोड तर्फ आउँदै गरेको प्रदेश १–०१–००१ ख ३४३५ नम्बरको कनकाई माइ पाथीभरा बसले सोहि दिशातर्फ आउँदै गरेको को १६ प ५३२२ नम्बरको मोटरसाइकललाई ठक्कर दिएको जिल्ला प्रहरी कार्यालय झापाले जनाएको छ ।
दुर्घटनामा मोटरसाइकल चालक मोरङको केराबारी गाउपालिका -७ का अन्दाजी ५५ वर्षीय मुकारुम राईको घटनास्थलमै मृत्यु भएको हो ।
दुर्घटनापछि बसको गल्ती भएको भन्दै स्थानीयले बसमाथि ढुंगामुढा र आगजनी गरेका छन्। आगजनीपछि अहिले राजमार्गमा ठूलो भिड लागेको छ । भिडलाई नियन्त्रणमा लिन प्रशासनले बाक्लो प्रहरी परिचालन गरेको छ। आधा घण्टादेखि पूर्व–पश्चिम राजमार्ग अवरुद्ध भएको छ ।राजमार्ग अवरुद्ध भएपनि प्रहरीले वैकल्पिक मार्गबाट यातायात संचालन गरिरहेको छ ।
दुर्घटना पछि बसका चालक घेरादह नगरपालिका -१ का ३५ वर्षीय सञ्जय नेपालीलाई नियन्त्रणमा लिइएको प्रहरीले जनाएको छ।
Nepali