झापा । बाहुन्डाँगी युवा क्लबको आयोजनामा यही वैशाख १३ गतेदेखि बाहुन्डाँगी च्यालेन्ज कप फुटबल प्रतियोगिता हुने भएको छ। मेचीनगर -४ स्थित सरस्वती माविको खेल मैदानमा सञ्चालन हुने प्रतियोगिता बारे आयोजकले आज पत्रकार सम्मेलन मार्फत जानकारी गराएको हो ।
क्लबका अनुसार खेलकुद, शिक्षा, स्वास्थ्य, युवा जागरण, बालबालिका तथा सामाजिक चेतनामूलक कार्यक्रममार्फत समाजमा सकारात्मक परिवर्तन ल्याउने उद्देश्य सहित प्रतियोगिता सञ्चालन गर्न लागिएको हो । क्लबले महिला, दलित, पिछडिएको वर्ग तथा स्थानीय युवाहरूलाई फुटबल तथा अन्य सामाजिक गतिविधिमा सक्रिय गराउँदै आएको छ।
प्रतियोगिताको पहिलो पुरस्कार रु. १,११,१११, र दोस्रो पुरस्कार रु. ६१,००१ रहेको छ। उत्कृष्ट खेलाडी, गोलकिपर, डिफेन्डर, मिडफिल्डर, फरवार्ड र उच्च गोलकर्तालाई जनही रु. ५,००० पुरस्कार प्रदान गरिने छ।
प्रतियोगिताको सह – आयोजक बाहुण्डाँगी जेसीज र आरआरटी टिम रहेको छ भने पुरस्कार प्रायोजन विद्या विकास एकेडेमीले गरेको आयोजकले जनाएको छ। प्रतियोगिता सम्पन्न गर्नका लागि ११ लाख २२ हजार अनुमानित रकम लाग्ने तथा १६ लाख रुपैयाँ संकलन गर्ने योजना रहेको क्लबले जनाएको छ।
प्रतियोगितामा भारतका २ क्लबसहित ८ वटा क्लबहरूको सहभागिता रहने छ। जसमा रेडहर्स एफसी इलाम, के.एफसी सिलिगुडी (भारत), धाइजन एफसी, ब्रदर्श युनाइटेड एफसी, शनिश्चरे एफसी – झापा, जहदा एफसी मोरङ, आयोजक बाहुण्डाँगी युवा क्लब, र रथखोला फुटबल एकेडेमी नक्सालबारी भारत रहेका छन्। प्रतियोगिताको उद्घाटन खेल रेडहर्स इलाम र केएफसी सिलगुढीबीच हुनेछ।
यस प्रतियोगितालाई सफल बनाउन मेचीनगर-४ वडा कार्यालय, विभिन्न संघसंस्था र फुटबल संघको सहयोग रहने बताइएको छ। क्लबका सचिव नीरज राई र अध्यक्ष जीवन कुमार दर्जीले सबैलाई सहयोगका लागि आह्वान गरेका छन्।
Nepali