ताप्लेजुङ — ताप्लेजुङको सिदिङबा गाउँपालिका–५, आङखोपमा पहिरोले घर पुरिँदा पाँच जना घाइते भएका छन्।
स्थानीय हस्तबहादुर कटुवालको घरमा गएको राति करिब १ बजेतिर पहिरो खस्दा उनकी ५० वर्षीया श्रीमती ठगमाया कटुवाल गम्भीर घाइते भएकी छन्। अन्य चार जना परिवारका सदस्य सामान्य घाइते भएका वडाध्यक्ष रत्नबहादुर खत्रीले जानकारी दिए।
वडाध्यक्ष खत्रीका अनुसार कुलोमा बगेको पानी थुनिँदा खेत हुँदै पहिरो खसेर घरमा ठोक्किएको थियो। पहिरोले घर पुरिएपछि छेउको मतानमा सुतेका छोराबुहारीले तत्कालै आमाबुबाको उद्धार गरेका थिए।
घाइतेमध्ये घरमालिक हस्तबहादुर कटुवाल, छोरा जगत कटुवाल, बुहारी सरस्वती कटुवाल र छोरी सम्झना कटुवाललाई सामान्य चोट लागेको जनाइएको छ।
गम्भीर घाइते ठगमायाको थप उपचारका लागि एम्बुलेन्स बोलाइएको भए पनि पहिरो गएको सात घण्टासम्म पनि उद्धार हुन नसकेको स्थानीय मौसम सेलिङ लिम्बूले जानकारी दिए।
उनका अनुसार सिदिङबा गाउँपालिका–१ स्थित केन्द्र साब्लाखुबाट एम्बुलेन्स बोलाइएको हो। तर, घटनास्थलसम्म पुग्न आधा घण्टा लाग्ने भए पनि एम्बुलेन्स अहिलेसम्म नपुगेको गुनासो छ।
स्थानीयवासीका अनुसार राति वर्षा नभए पनि सिँचाइका लागि ल्याइएको कुलो थुनिएपछि पानी खेतबारीमा पस्दा पहिरो गएको हो।
हाल घटनास्थलमा साब्लाखु प्रहरी चौकीको टोलीले अनुसन्धान तथा क्षतिको विवरण सङ्कलनको कार्य थालेको छ।
Nepali