झापा, असार २३ – झापाको बिर्तामोडमा केन्द्रीय कार्यालय रहेको हाम्रो नेपाल बचत तथा ऋण सहकारी संस्था (साकोस) देशभरकै उत्कृष्ट साकोस घोषित भएको छ। साना किसान विकास लघुवित्त वित्तीय संस्था, बबरमहल काठमाडौँले हाम्रो नेपाल साकोसलाई उत्कृष्ट सहकारीका रूपमा घोषणा गर्दै आइतबार प्रशंसापत्र प्रदान गरेको हो।
देशभरका करिब १,७०० साझेदार संस्थामध्ये उत्कृष्ट ठहर गर्दै लघुवित्तले २४औँ वार्षिक साधारणसभाको अवसरमा हाम्रो नेपाल साकोसलाई सम्मान गरेको हो। कार्यक्रममा पूर्व अर्थमन्त्री डा. युवराज खतिवडा, साना किसान विकास लघुवित्तका अध्यक्ष खेमबहादुर पाठक, प्रमुख कार्यकारी अधिकृत शिवरामप्रसाद कोइरालालगायतले साकोसका अध्यक्ष भवानीप्रसाद दङ्गाललाई फूलमाला, अबिर, खदा र प्रशंसापत्र हस्तान्तरण गरेका थिए।
विगत १२ वर्षदेखि सञ्चालनमा रहेको हाम्रो नेपाल साकोसले २०८१ साउनदेखि २०८२ जेठ मसान्तसम्मको आर्थिक कारोबारका आधारमा उत्कृष्ट व्यवसायिक साझेदारको मान्यता पाएको हो।
हाल यस साकोसका ३८ हजारभन्दा बढी सेयर सदस्य छन् भने झापा, मोरङ र इलाममा रहेका ३१ वटा सेवा केन्द्रमार्फत सेवा प्रवाह गरिरहेको छ। वार्षिक अढाई अर्ब रुपैयाँभन्दा बढीको आर्थिक कारोबार गरिरहेको यस साकोसले स्थानीयदेखि राष्ट्रिय तहसम्म उल्लेखनीय सफलता हासिल गरेको छ।
Nepali