झापा । मधेस प्रदेशलाई नेपालबाट टुक्र्याउने आपत्तिजनक अभिव्यक्ति दिएका मधेश प्रदेशका जनता समाजवादी पार्टीका प्रदेश अध्यक्ष तथा पूर्व प्रदेशसभा सदस्य अशोक यादवमाथि प्रहरीले दुर्व्यवहार गरेको भन्दै विभिन्न राजनीतिक दलहरूले गम्भीर आपत्ति जनाएका छन्। उनीहरूले उक्त घटनाप्रति गहिरो ध्यानाकर्षण भएको जनाउँदै दोषी प्रहरी अधिकारीलाई कारबाही गर्न माग गरेका छन्।
जसपाका जिल्ला अध्यक्ष शम्भु प्रसाद यादव, नेपाल समाजवादी पार्टीका जिल्ला उपाध्यक्ष जितेन्द्र कुमार साह, माओवादी केन्द्रका प्रदेश सदस्य शिव पुजन राय, एकीकृत समाजवादीका जिल्ला प्रतिनिधि सजिव यादव, लोकतान्त्रीक समाजवादी पार्टीका जिल्ला सचिव मिथलेश यादव र जनमत पार्टीका क्षेत्रीय अध्यक्ष दिलिप कर्णले संयुक्त प्रेस विज्ञप्ति जारी गर्दै घटना प्रति आपत्ति जनाएका हुन्।
विज्ञप्तिमा उल्लेख अनुसार, मिति २०८२ असार १५ गते बिहीवार राति पूर्वाधार विकास कार्यालयमा कार्यालय प्रमुखले मुख्य ढोका बन्द गरी प्रहरी परिचालनसहित कार्यालय संचालन गरेको दृश्यले सेवाग्राही त्रसित भएका थिए। सो घटनाबारे जानकारी पाएपछि ज.स.पा.का प्रदेश अध्यक्ष अशोक यादवले जिल्ला प्रहरी प्रमुख योगेन्द्र कुमार खड्कासँग टेलिफोनमार्फत कुरा गर्दा “मधेशी” भनेर विभेदपूर्ण व्यवहार गरिएको आरोप लगाइएको छ।
राजनीतिक दलहरूले यस्तो व्यवहार खेदजनक मात्र नभई नश्लीय सोचको उपज भएको आरोप लगाउँदै प्रदेश अध्यक्ष यादवमाथि लगाइएको झुटो मुद्दा खारेज गर्न माग गरेका छन्। साथै, जिल्ला प्रहरी प्रमुखमाथि तत्काल कडा कारबाहीको माग गर्दै छानबिन समिति गठन गरिनु पर्ने जनाएका छन्।
यदि यस्ता विभेदकारी व्यवहार तत्काल नसच्याइए आगामी दिनमा कडा सडक संघर्ष गर्ने चेतावनी समेत विज्ञप्तिमा दिइएको छ। 
Nepali