ढाका – मिना देउवाको ह्याट्रिकसहित नेपालले साफ यू-२० महिला च्याम्पियनसिपमा श्रीलंकामाथि ७-० को फराकिलो जित दर्ता गरेको छ।
बंगलादेशको बसुन्धरा किङ्स एरिनामा वर्षाका कारण ढिला गरी सुरु गरिएको खेलमा नेपालले उत्कृष्ट प्रदर्शन गर्दै गोलको वर्षा गर्यो।
नेपालको जितमा मिना देउवाले ह्याट्रिक गरिन्। पूर्णिमा राईले दुई गोल गर्दा समिक्षा मगर र सरिता कुमारी नाथले एक–एक गोल थपे।
खेलको आठौं मिनेटमा मिना देउवाले बक्स बाहिरबाट गरेको प्रहार गोलमा परिणत गर्दै नेपाललाई अग्रता दिलाइन्। १३ औं मिनेटमा समिक्षा मगरले श्रीलंकन डिफेन्सले क्लियर गर्न नसकेको बललाई बक्स बाहिरबाट प्रहार गरी गोल गरे।
४२ औं मिनेटमा माया मास्केको लामो प्रहार श्रीलंकाकी गोलकिपरले रोक्न खोजेपनि रिबाउन्डमा मिनाले दोस्रो गोल गरिन्। पहिलो हाफको इन्जुरी टाइममा पूर्णिमा राईले दुई गोल गर्दै स्कोरलाइन ५-० बनाइन्।
दोस्रो हाफमा नेपालले थप दुई गोल गर्यो। ७० औं मिनेटमा वर्षा ओलीको पासमा मिनाले आफ्नो ह्याट्रिक पूरा गरिन्। इन्जुरी समयको पहिलो मिनेटमा सरिता कुमारी नाथले करिब २५ यार्ड टाढाबाट गरेको फ्रि–किक गोलमा परिणत भयो र नेपालले ७-० को फराकिलो जित दर्ता गर्यो।
नेपालले यसअघि पहिलो खेलमा भुटानलाई ६-१ ले हराएको थियो भने दोस्रो खेलमा आयोजक बंगलादेशसँग ३-२ ले पराजित भएको थियो। अब नेपालले बिहीबार पुनः श्रीलंकासँग प्रतिस्पर्धा गर्नेछ। प्रतियोगितामा ४ टोलीले एकअर्कासँग दुई–दुई पटक खेल्नेछन् र शीर्ष स्थानमा रहने टोली च्याम्पियन बन्नेछ।
Nepali