विर्तामोडबाट फेरि प्रतिबन्धित लागू औषध ट्रामाडोलसहित एक व्यक्ति पक्राउ

विर्तामोड – झापाको बिर्तामोड नगरपालिका–५ स्थित कंचन टोलमा प्रतिबन्धित लागू औषध ट्रामाडोल (Tramadol Hydrochloride Capsules I.P. – Tramol-50) को ठूलो मात्रामा भण्डारण गरिएको विशेष सूचनाका आधारमा प्रहरीले एक जनालाई पक्राउ गरेको छ।

आज बिहान १०:२० बजे लागू औषध नियन्त्रण ब्युरो काकडभिट्टा र ईलाका प्रहरी कार्यालय अनारमनीबाट खटिएको संयुक्त प्रहरी टोलीले राजेन्द्र पंथाकको घरमा छापा मारेको हो। छानबिनका क्रममा घरको भुइँतलाबाट माथिल्लो तलामा जाने सिँढीमुनी कागजका कार्टुनले ढाकी लुकाइएको अवस्थामा २०,००० (बीस हजार) थान ट्रामाडोल क्याप्सुल फेला पारिएको प्रहरीले जनाएको छ।

४६ वर्षीय पंथाकलाई नियन्त्रणमा लिएर अनारमनीस्थित प्रहरी कार्यालयमा राखिएको छ भने घटनासम्बन्धमा थप अनुसन्धान जारी रहेको प्रहरीले जानकारी दिएको छ। यसअघि पनि प्रहरीले विर्तामोडकै एक घरबाट ठुलो मात्रामा ट्रामाडोल सहित लागूऔषध बरामद गरेको थियोे ।