अन्तर मावि भलिबल प्रतियोगिताको उपाधि आदर्श माविलाई

काँकरभिट्टा । झापाको मेचीनगर -६ स्थित एमीटी पब्लिक स्कुलको आयोजनामा  सम्पन्न अन्तर–मावि भलिबल प्रतियोगिताको उपाधि आदर्श माध्यमिक विद्यालयले हात पारेको छ।

आइतबार एमिटी पब्लिक स्कुल, काँकरभिट्टाको खेल मैदानमा सम्पन्न प्रतियोगिताको फाइनलमा आदर्श मावि, इटाभट्टा विजेता बन्न सफल भएको हो।

फाइनल खेलमा आदर्शले सरस्वती मावि, बाहुनडाँगीलाई सोझो सेटमा पराजित गर्दै उपाधि जितेको हो।
विजेता तथा उत्कृष्ट खेलाडीलाई प्रमुख अतिथि वडा सदस्य ध्रुव राई, विशिष्ट अतिथि प्याब्सन झापाका अध्यक्ष धर्मराज माझीलगायतले पुरस्कार वितरण गरेका थिए।
प्रतियोगिताको उत्कृष्ट खेलाडी आदर्श माविका रुपेश गौतम घोषित भएका छन्।

कार्यक्रमको समापन समारोहमा विद्यार्थीहरूले आकर्षक नृत्य प्रस्तुति दिएका थिए।
सो अवसरमा प्रमुख अतिथि राई, प्याब्सन अध्यक्ष माझी, भानु साहित्यिक प्रतिष्ठानका अध्यक्ष डिल्लीराम घिमिरे, जीआर धिताललगायतले विद्यार्थीहरूको प्रतिभा उजागर गर्न यस किसिमका कार्यक्रम आवश्यक रहेको बताउँदै विद्यालयलाई धन्यवाद व्यक्त गरेका थिए।

समापन कार्यक्रम विद्यालयका संस्थापक प्रिन्सिपल सुवर्ण भट्टराईको अध्यक्षता र को–अर्डिनेटर सीता अधिकारीको संचालनमा सम्पन्न भएको थियो।