झापा । खुला सीमा क्षेत्रमा नागरिकको सुरक्षित र सहज आवागमन सुनिश्चित गर्दै सीमा अपराध नियन्त्रणलाई प्रभावकारी बनाउन सशस्त्र प्रहरी बल, नेपालले सीमा नाकाहरूमा सीमा समन्वय टोली (Border Interaction Team–BIT) परिचालन गरेको छ।
सशस्त्र प्रहरीले सीमा क्षेत्रमा सुरक्षा व्यवस्थालाई थप व्यवस्थित बनाउने उद्देश्यले विशेष अवधारणाअन्तर्गत BIT टोली परिचालन गरेको हो। उक्त टोलीले सीमा नाकाबाट आवतजावत गर्ने यात्रु तथा सर्वसाधारणसँग मैत्रीपूर्ण व्यवहार गर्दै आवश्यक सहजीकरण गर्नेछ।
BIT टोलीले विशेषगरी सीमा क्षेत्रमा हुने मानव बेचबिखन, अवैध गतिविधि तथा शंकास्पद गतिविधिको निगरानी र नियन्त्रण मा भूमिका खेल्ने जनाइएको छ।
टोलीले सीमा नाकामा महिला, बालबालिका, ज्येष्ठ नागरिक तथा असहाय व्यक्तिहरूको आवागमनमा सहयोग गर्ने, यात्रुहरूलाई आवश्यक जानकारी उपलब्ध गराउने तथा सुरक्षा अवस्थाबारे सूचना संकलन गर्ने कार्य गर्नेछ।
सशस्त्र प्रहरीका अनुसार BIT टोलीले स्थानीय प्रशासन, नेपाल प्रहरी, स्थानीय तह तथा अन्य सरोकारवाला निकायसँग समन्वय र सहकार्य गर्दै सीमा क्षेत्रको अवस्था मूल्यांकन गर्नेछ।
सीमा सुरक्षा, अपराध नियन्त्रण र नागरिकमैत्री सेवा प्रवाहलाई प्रभावकारी बनाउने उद्देश्यले सञ्चालन गरिएको BIT टोलीले सीमा क्षेत्रमा सुरक्षा र सहजीकरणबीच सन्तुलन कायम गर्ने विश्वास लिइएको छ।
Nepali