काठमाडौँ । ब्राजिलका राष्ट्रपति लुला डा सिल्वालाई अध्यक्ष बनाउँदै जी २० समिट समापन भएको छ । यसका साथै आगामी वर्ष हुने जी २० समिटको आयोजना समेत ब्राजिलले गर्नेछ । भारतका राष्ट्रपति नरेन्द्र मोदीले संस्कृत भाषामा स्वस्ति अस्तु विश्यस्य ! अर्थात सम्पूर्ण विश्वमा आशा र शान्तिको सञ्चार होस् भन्दै जी २० समिटको समापन गरेका हुन् ।
जी २० को अध्यक्षको भूमिका ग्रहण गर्दै ब्राजिलका राष्ट्रपतिले ३ वटा विषयलाई प्राथमिकता दिने बताए–१) सामाजिक न्याय र भोकमरीका विरुद्ध लडाई २) दिगो विकास ३) संसारका संस्थानहरूमा परिवर्तन ।
के यस प्रकारको समिटले विश्वमा सामाजिक न्यायका पक्षमा काम गर्छ त ? यो विषयमा राष्ट्रिय जनमोर्चाका महासचिव मनोज भट्ट भन्नुहुन्छ, ‘पुँजीवादी देशहरूले आफ्नो सङ्कट टार्न ब्रिस्क, सार्क, जी २० जस्ता सङ्गठनहरू खोल्ने गरेका छन् । तर यस प्रकारका प्रयासहरू असफल हुँदै गएका छन् ।’ वहाँको तर्क छ, ‘संसारका श्रमजीवी जनताको लागि पुँजीवादी तथा साम्राज्यवादी देशहरूको कथित दिगो विकास जस्ता नाराको कुनै अर्थ छैन ।’
स्मरण रहोस् जी २० समिट, सन् २००८ मा विश्वमा आएको आर्थिक सङ्कटको व्यवस्थापन गर्ने उद्देश्यका साथ उदयमान अर्थतन्त्र भएका देशहरूको साझा सङ्गठनको रूपमा खोलिएको हो । उदयमान अर्थतन्त्र नभएको भन्दै नेपाललाई यो समिटमा समावेश गरिएको छैन । जी–२० मा युरोपियन सङ्घका साथै विभिन्न १९ देशहरू अस्ट्रेलिया, अर्जेन्टिना, ब्राजिल, क्यानडा, चीन, फ्रान्स, जर्मनी, भारत, इन्डोनेसिया, इटली, जापान, मेक्सिको, रुस, साउदी अरब, दक्षिण अफ्रिका, दक्षिण कोरिया, टर्की, बेलायत, अमेरिका आबद्ध छन् ।
Nepali