मेचीनगर । झापाको मेचीनगर नगरपालिकाको सार्वजनिक सुनुवाई कार्यक्रम सम्पन्न भएको छ । आर्थिक बर्ष २०८०/०८१ मा नगरमा भए गरेको गतिविधि सहित सार्वजनिक सुनुवाई सम्पन्न भएको हो ।
सार्वजनिक सुनुवाई कार्यक्रम मेचीनगर नगरपालिकाको आयोजना तथा काजी मिडिया एण्ड टेक्निकल प्रालिको सहजीकरणमा सम्पन्न भएको हो । नगरपालिकाको सभाहलमा सम्पन्न कार्यक्रममा सहभागि बिजय डालमिया, भूमि पौडेल, गोपाल बस्नेत, राजु महर्जन, लाक्पा लामा, सन्दिप थापा, सरस्वती सिटौला, देबु बानियाँ, प्रविण अधिकारी, खगेन्द्र घिमिरे, मञ्जील देवानलगायतले बोल्दै नगर र नगरबासीलाई समृद्ध बनाउन स्वास्थ्य, शिक्षा, कृषि, पर्यटन, खेलकुदलगायत बिषयलाई प्राथमिकता दिनुपर्ने सुझाव दिएका थिए । साथै स्थानीय सरकारको हैसियतले मेचीनगर क्षेत्रको व्यापार व्यवसायमा प्रवर्द्धन, लागुऔषध दुव्र्यशनी न्यूनिकरण, खेलकुद क्षेत्रको विकास तथा पन्ध्रवटै वडामा प्राथमिकताका आधारमा भौतिक पुर्वाधार विकास हुनुपर्ने उनिहरूको भनाइ थियो । 
कार्यक्रममा सहभागीबाट आएका गुनासो तथा सुझाबलाई मेचीनगर प्रमुख गोपालचन्द्र बुढाथोकीले सम्बोधन गर्दै जवाफ दिएका थिए । सुशासनका लागि सार्वजनिक सुनुवाई गरिएको बताउँदै उनले अहिले थुप्रै जनमुखी कार्यहरू अगाडि बढाइएको भएतापनि अझै धेरै गर्न बाँकी रहेको बताए । उनले समग्र मेचीनगर र नगरबासीको विकासका लागि ठोस नतिजा आउनेगरी कामहरू अगाडि बढीरहेको बताउँदै अब नागरिकको चाहाना अनुसारको कार्यसम्पादन हुने बताए ।
उप-प्रमुख मीना पोख्रेल उप्रेतीले आफुहरू जनताको सेवाको लागि आएको बताउँदै जनअपेक्षा र उनिहरूक आवश्यकता अनुसार क्रमश कार्यक्रमले तिब्रता पाउने बताइन् । उनले आफुहरू सदैब जनताको सेवामा लागि पररहने बताइन् ।
कार्यक्रममा वर्तमान तथा आगामी आर्थिक बर्षको जनपक्षीय कार्यक्रमहरूको चर्चा गर्दै प्रमुख प्रशासकीय अधिकृत अग्निप्रसाद अधिकारीले नगरमा सेवाग्राहीलाई छिटो छरितो ढंगले सेवा दिन आफुहरू लागि परिरहेको बताए । सम्पूर्ण प्रक्रिया पुगेको सेवाग्राहीकाे काम बिना झन्झट यथाशीघ्र सम्पन्न गरि चुस्त दुरुस्त सेवा दिने उनले बताए । 
सञ्चारकर्मी अम्बिका भण्डारीले सञ्चालन गरेको सार्वजनिक सुनुवाई कार्यक्रममा नगर प्रमुख, उपप्रमुख, प्रमुख प्रशासकीय अधिकृतसंगै विभिन्न वडाका वडाध्यक्ष, कार्यपालिका सदस्य, वडासदस्य, सर्वसाधारण नागरिक र सञ्चारकर्मीहरूको उल्लेख्य सहभागीता रहेको थियो ।
Nepali