ढल्यो प्रचण्ड सरकार, दुई तिहाइ सांसदको अविश्वास

झापा । संसदमा विश्वासको मत प्राप्त गर्न नसके सँगै १९ महिनापछि प्रधानमन्त्री पुष्पकमल दाहाल ‘प्रचण्ड’ नेतृत्वको सरकार ढलेको छ ।

आज संसदमा मत दिने क्रममा २५८ सांसदहरु उपस्थित थिए । प्रधानमन्त्रीको प्रस्तावको पक्षमा माओवादी, रास्वपा र नेकपा एसका ६३ सांसदले मतदान गरे भने अन्य दलका विपक्षमा १९४ जनाले मतदान गरे । २७५ सदस्यीय प्रतिनिधिसभामा तटस्थमा एक मत पर्‍यो ।

संसदका दुई ठुला दल कांग्रेस र एमाले मिलेर सरकार बनाउने सहमति भएपछि सरकार ढल्ने निश्चित हुँदा पनि प्रचण्डले विश्वासको मत लिएका हुन् । प्रचण्ड सरकार ढलेसँगै ओलीलाई दुई तिहाइको प्रधानमन्त्री बनाउने सहमतिअनुसार कांग्रेस एमालेले नयाँ सरकार गठन प्रक्रिया अघि बढाउनेछन् । उक्त सरकारमा अन्य दललाई समेत समेट्ने गरि तयारी भइरहेको बुझिएको छ।