झिलझिले । नेपाली कांग्रेसको भातृ संस्था नेपाल महिला संघको ७७ औँ स्थापना दिवस झापाको शिवसताक्षीमा वृक्षरोपण गरि मनाईएको छ ।
नेपाल महिला संघ शिवसताक्षी नगर समितिको आयोजनामा धार्मिक तथा पर्यटकिय स्थल सताक्षीधाममा विभिन्न जातका विरुवा रोपेर नेपाल महिला संघका अगुवा महिलाले स्थापना दिवस मनाएका हुन् ।
चुलोचौकामा सीमित महिलालाई राजनीतिमा स्थापित गर्नका लागि तत्कालिन महिलानेत्री मंगलादेवी सिंहको सक्रियतामा २००४ साउन २४ गते नेपाल महिला संघको स्थापना भएको थियो । सिंहको सक्रियतामा काठमाडौँको भेडासिंस्थित चिनियाँलाल श्रेष्ठको घरमा भूमिगतरूपमा महिला भेला भएर नेपाल महिला संघको नामाकरण संगै संस्था स्थापना गरेका हुन् ।
सो भेलाले सिंहको अध्यक्षतामा ११ सदस्यीय महिला संघ तदर्थ कार्यसमिति गठन भएको थियो । महिला अधिकारका लागि राजनीतिक संगठन स्थापना भएको साउन २४ लाई नै नेपाली राजनीतिमा महिलाको प्रवेशका लागि कोशेढुंगाका रूपमा लिने गरिएको नेपाली कांग्रेसका नेता तथा कोशि प्रदेश सदस्य उत्तम चौलागाईले बताए । नेपाल महिला संघले यसैलाई आफ्नो स्थापनाको मिति मान्दै आएको उनले जानकारी दिए । चौलागाईँ पार्टीका महासमिति सदस्य पनि हुन् ।
महिला अधिकार तथा महिलावादमा केन्द्रित राजनीतिक संगठन स्थापना भएको साउन २४ लाई राजनीतिमा नेपाली महिलाहरुको प्रवेशका लागि कोषेढुङ्गा तथा आधारस्तम्भका रुपमा लिन सकिने चौलागाईँले बताए ।
नेपालमा महिला अधिकार तथा महिलावादमा केन्द्रित राजनीतिक संगठन स्थापना गरि लोकतान्त्रिक राज्य व्यवस्थामा मूल्य मान्यता पद्धतिको स्थापनाको उदेश्य भए पछि को २००७ सालको राणा विरोधी आन्दोलन , २०३६ सालको जनमतसंग्रह , २०४६ सालको जनआन्दोलन भागः– १ र २०६२÷ ०६३ सालको जनआन्दोलन भागः–२ मा महिलाको भुमिका अहम् रहेको पार्टीका प्रदेश समिति सदस्य किरण भट्टराईले बताए । उनले यस्ता विभिन्न राजनीतिक आन्दोलनमा सकृय भूमिका निर्वाह गरी ऐतिहासिक जिम्मेवारीको भुमिका महिलाले निर्वाह गरेको बताए ।
तत्कालिक समयमा नेपाल महिला संघले खेलेको भुमिकालाई अब अझ बढी सशक्त तरिका ले अघि बढाउन नेपाल महिला संघलाई पार्टीका महासमिति सदस्य मचिन्द्र शेर्माले आव्हान गरेका छन्् । कार्यक्रममा नेपाली कांग्रेस शिवसताक्षी नगरका सभापति अशोक बस्नेतले पनि मन्तव्य राखेका थिए ।
संघकी उपसभापति खनिमाया श्रेष्ठले स्वागत गरेको कार्यक्रमको सहजिकरण संङघकी नगर सचिव सीता बाँस्कोटाले गरेकी थिइन् । कार्यक्रम नेपाल महिला सङघ शिवसताक्षीकी सभापति लोचना लावतीको अध्यक्षतामा भएको थियो ।
Nepali