मेचीनगर। झापाको मेचीनगर -७ इटाभट्टामा राजवंशी समुदायले “दधिकाद” पर्व धुमधाम साथ मनाएका छन्। विशेषगरी नेपालको पूर्वी तराईमा बसोबास गर्ने आदिवासी समुदायले बर्सेनि मनाउँदै आएको परम्परागत दधिकाद पर्व यो वर्ष पनि भव्य रूपमा मनाइएको छ । राजवंशी समुदायले आज मंगलबार झापाका विभिन्न स्थानमा हर्षोल्लासका साथ दधिकाद पर्व मनाएका हुन् । 
मेचीनगर -७ स्थित बाइरुबारीमा सम्पन्न “दधिकाद” पर्वमा राजवंशी समुदायले पर्व सँग सम्बन्धित विभिन्न ५ वटा खेलहरु खेलाएको स्थानीय युवा बब्लु राजवंशीले जानकारी दिए।
कार्यक्रममा झुला खेल, चिप्ले बाँस खेल, बाँस खेल, भ्यागुते खेल र हाँडी खेल खेलाइएको थियोे । उक्त खेलमा सहभागी मध्य क्रमश झुला खेलमा बुधारु राजवंशी , चिप्ले बाँस खेलमा दुलाल राजवंशी, भ्यागुते खेलमा विशोक राजवंशी, र हाँडी खेलमा ललित राजवंशी र निशान ठाकुर विजयी भएका थिए। 
विजयी हुनेहरुलाई विभिन्न विधामा साइकल, चाँदीको माला, घडी , नगद लगायतको पुरस्कारले सम्मान गरिएको थियोे ।
श्रीकृष्ण जन्माष्टमीको भोलिपल्ट दधिकाद पर्व मनाइने परम्परा चलिआएको छ। राजवंशी समुदायले भगवान् कृष्णले दही चोरेर खाने र दहीको हिलोमा खेलेको सम्झनामा अहिले माटोको हिलोलाई नै दही मानी खेल्ने परम्परा चलिआएको स्थानीय बब्लु राजवंशीले बताए ।
दधिकाद खेल खेलाउँदा आफ्नो मन चाहेको कुरा पुग्ने विश्वास भएकाले गाउँघरमा यो खेल खेलाउने चलन रहेको छ ।
भजन कीर्तन गर्दै तेल दलेको चिल्लो बाँसमाथि चढेर पोको फुकाउने, हिलो दलेर नरिवल खोस्ने, हाँडी फुटाएर पुरस्कार जित्ने प्रतियोगितात्मक खेलकुदलगायत एक आपसमा हिलो दलादल गरेर यो पर्व मनाइँदै आएको पाइन्छ । 
Nepali