प्रविण अधिकारी
मेचीनगर । झापाको मेचीनगर -५ स्थित माङ्हिम टोलमा ३ दिने धार्मिक मेला लाग्ने भएको छ। विगतका वर्षहरुझैँ यस वर्षपनि यहि मंसिर ३० गतेदेखि पुष २ गतेसम्म मेला सञ्चालन हुने समितिका अध्यक्ष महेन्द्र लावतीले बताए ।
उक्त धार्मिक सांस्कृतिक मेलामा मंसिर ३० गते पुर्णिामाका दिन पुजापाठ तथा विभित्र सांस्कृतिक नृत्य हुने र बाँकी २ दिन विभिन्न प्रकारका खेलकुद तथा राष्ट्रिय तथा स्थानीय कलाकारहरुको साथमा सांगीतिक कार्यक्रम गरिने स्थानीय समाजसेवी दिलिपजंग सुब्बाले बताए ।
लिम्बूहरुको कुल देवताका रुपमा पुजा गरिँदै आएको युमा माङहिम मन्दिर परिसरमा मेला आयोजना हुने भएको हो । शनिबार पत्रकारहरुसँग कुरा गर्दै आयोजक समितिले मेलामा रचना रिमाल, अनु चौधरी लगायतका कलाकारहरु समेत आउने जानकारी दिएको छ।
मेला सम्पन्न गर्न अनुमानित ६ लाख रुपैयाँ लाग्ने र त्यसको ब्यवस्थापन नगरपालिका, वडा र स्थानीय समाजसेवीहरुबाट सहयोग संकलन भइरहेको मेला आयोजक समितिका सचिव डम्बर गिरीले जानकारी दिए।
विगत २२ वर्ष अघिदेखि उक्त स्थानमा माङहिम धार्मिक मेला लाग्दै आइरहेको छ। किरात सव्यतालाई धान्दै आएको युवा पुस्ताले अहिले मन्दिर परिसरमा सरसफाइ तथा रंगरोगनको काम गरिरहेको छ।
Nepali