झापा । साफ यू-२० महिला च्याम्पियनसिप अन्तर्गत नेपालले आज घरेलु टोली बंगलादेशसँग प्रतिस्पर्धा गर्दैछ। खेल नेपाली समयअनुसार साँझ ६:४६ बजे ढाकास्थित बसुन्धरा किङ्स एरिनामा सुरु हुनेछ।
प्रतियोगिताको साविक विजेता बंगलादेश यसपटक पनि नेपालका लागि सबभन्दा बलियो प्रतिस्पर्धी मानिएको छ। अघिल्लो संस्करण सन् २०२३ मा यी दुई टोली लिग चरण र फाइनलमा आमनेसामने भएका थिए। लिग चरणमा नेपाल ३–१ ले पराजित भएको थियो भने फाइनलमा ३–० को हार बेहोरेको थियो।
सन् २०२२ यता सिनियर महिला टिम तथा अन्य उमेर समूहका खेलमा नेपालले बंगलादेशविरुद्ध जित हासिल गर्न सकेको छैन। त्यसकारण आजको खेल नेपालका लागि विगत तीन वर्षको हारको श्रृंखला तोड्ने अवसरका रूपमा हेरिएको छ।
बंगलादेशको यु-२० टिम सिनियर टिमका अनुभवी खेलाडीले भरिएको हुँदा प्रतियोगिताको सबभन्दा बलियो टिम मानिन्छ। उसले पहिलो खेलमा श्रीलंकामाथि ९–१ को फराकिलो जित दर्ता गरिसकेको छ। उता, नेपालले पहिलो खेलमा भुटानलाई ६–१ ले हराएको थियो। उक्त खेलमा नेपालकी पूर्णिमा राईले ह्याट्रिक सहित चार गोल गरेकी थिइन् भने सेनु परियारले दुई गोल गरेकी थिइन्।
यस संस्करणको प्रतियोगिता डबल राउन्ड रोबिन फर्म्याटमा भइरहेको छ। लिग चरणमै शीर्ष स्थानमा रहने टोलीले उपाधि जित्नेछ।
नेपाली टोली यसप्रकार छन् :
बिर्सना चौधरी (कप्तान), लीला जोशी, करुणा बुढाथोकी, सुजाता तामाङ, सरिता कुमारी नाथ, माया मास्के, सेमिहाङ्मा लिम्बु पन्धाक, सिम्रन राई, झुमा विश्वकर्मा, गङ्गा रोकाया, अनिशा राई, सीता रोकाया, कविता गुरुङ, सुशीला के.सी., अस्मिता गुरुङ, सेनु परियार, कुसुम खतिवडा, शुक्रिया मियाँ, मनिषा सेन, वर्षा ओली, पूर्णिमा राई, मीना देउवा र समीक्षा मगर।
Nepali