झापा । टि–२० विश्वकप एसिया तथा पूर्वी एसिया प्यासेफिक क्षेत्रीय छनोटको तयारीका लागि नेपाल क्रिकेट संघ (क्यान)ले ३२ सदस्यीय प्रारम्भिक टोली सार्वजनिक गरेको छ। राष्ट्रिय टोलीबाट झण्डै तीन वर्ष टाढा रहेका मोहम्मद आदिल आलम पनि प्रारम्भिक टोलीमा परेका छन्।
पूर्वमा नेपाल टि–२० लिगमा फिक्सिङको आरोपमा प्रतिबन्धित रहेका आलम दोष प्रमाणित नभएपछि प्रतिबन्धमुक्त भएका थिए। त्यसयता पहिलो पटक उनले राष्ट्रिय टोलीको प्रारम्भिक सूचीमा पुनरागमन गरेका हुन्।
प्रारम्भिक टोलीमा यु–१९ टोलीका उदयीमान क्रिकेटर युवराज खत्रीको समेत नाम समावेश गरिएको छ। यस्तै अभिनास बोहोराले भने टोलीमा स्थान बनाउन सकेनन्।
नेपालले यही वर्ष अक्टोबरमा ओमानमा आयोजना हुने टि–२० विश्वकप एसिया तथा पूर्वी एसिया प्यासेफिक छनोटमा प्रतिस्पर्धा गर्नेछ। छनोट अघि नेपालले अष्ट्रेलिया भ्रमण गर्ने कार्यक्रम छ भने त्यस क्रममा वेस्ट इन्डिजसँग तीन खेलको टि–२० अन्तर्राष्ट्रिय सिरिज खेल्नेछ।
आगामी विश्वकपका लागि ९ टोली सहभागी हुने छनोट प्रतियोगितामा सहभागी राष्ट्रलाई तीन समूहमा विभाजन गरिएको छ। प्रत्येक समूहबाट शीर्ष दुई टोली सुपर सिक्स चरणमा प्रवेश गर्नेछन्। सुपर सिक्समा उत्कृष्ट तीनमा पर्ने टोलीले भारत र श्रीलंकामा सन् २०२६ मा आयोजना हुने टि–२० विश्वकपमा स्थान बनाउनेछन्।
नेपालले समूह चरणमा कुवेत र जापानसँग प्रतिस्पर्धा गर्नेछ। नेपाल लगातार दोस्रो तथा समग्रमा तेस्रो पटक टि–२० विश्वकपमा स्थान बनाउने लक्ष्यमा छ।
प्रारम्भिक टोलीको सूची:
रोहित पौडेल, कुशल भुर्तेल, अनिल शाह, आसिफ शेख, भीम शार्की, लोकेश बम, कुशल मल्ल, आरिफ शेख, सन्दीप जोरा
दिपेन्द्र सिंह ऐरी, गुलशन झा, बसिर अहमेद, सागर ढकाल, युवराज खत्री, पवन सर्राफ, शेर मल्ल, सुभ कंसाकार, सन्दीप लामिछाने, ललित राजवंशी, शाहब आलम, कमल सिंह ऐरी, करण केसी, सोमपाल कामी, नन्दन यादव, रिजन ढकाल, प्रतिश जीसी, आकाश चन्द, रुपेश सिंह, बिबेक यादव, अर्जुन घर्ती, किरण ठगुन्ना र आदिल आलम रहेका छन्।
Nepali