झापा । साफ यू–२० महिला च्याम्पियनसिपमा नेपालले आज श्रीलंकासँग प्रतिस्पर्धा गर्नेछ। खेल नेपाली समय अनुसार साँझ ६:४५ बजे ढाकास्थित बसुन्धारा किंग्स एरिनामा हुनेछ।
पहिलो खेलमा भुटानलाई ६–१ ले पराजित गर्दै विजयी सुरुवात गरेको नेपाल दोस्रो खेलमा आयोजक बंगलादेशसँग ३–२ ले पराजित भएको थियो। अब उपाधि सम्भावना कायम राख्न नेपालका लागि श्रीलंकाविरुद्ध फराकिलो जित अनिवार्य बनेको छ।
चार टोली सहभागी प्रतियोगितामा बंगलादेश दुई खेलमा जित निकाल्दै ६ अंकसहित अग्रस्थानमा छ। नेपाल तीन अंकसहित दोस्रो स्थानमा रहेको छ भने श्रीलंका दुवै खेल हारेर अंकविहीन छ। उसले बंगलादेशसँग ९–१ र भुटानसँग ५–० को हार ब्यहोरेको थियो।
नेपालका लागि अहिलेसम्म पूर्णिमा राईले चार गोल गर्दै उत्कृष्ट प्रदर्शन गरेकी छन्। सेनु परियार, अनिशा राई र मिना देउवाले एक–एक गोल गरिसकेका छन्। श्रीलंकाका लागि भने जसोथारानले मात्र एक गोल गरेकी छन्।
नेपाल आजको खेलमा फराकिलो अन्तरको जित हासिल गर्दै गोलअन्तर सुधार गर्ने योजनामा छ।
Nepali