बाढीले डाइभर्सन बगाउँदा मेची राजमार्ग र तमोर करिडोर अवरुद्ध

फिदिम । लगातार वर्षासँगै आएको बाढीले पाँचथरको हेवा खोलामा बनेको डाइभर्सन बगाएपछि मेची राजमार्ग पूर्ण रूपमा अवरुद्ध भएको छ। बाढीले अस्थायी बेलिब्रिज बगाउनुका साथै निर्माणाधीन मोडुलब्रिज समेत क्षतिग्रस्त पारेपछि यातायात ठप्प भएको हो।

राजमार्ग अवरुद्ध भएपछि ताप्लेजुङ र पाँचथरका तीनवटा स्थानीय तहसँगै आसपासका क्षेत्रमा यातायात सेवा बन्द भएको जिल्ला प्रहरी कार्यालयका डीएसपी कौशल बुढाथोकीले जानकारी दिए।

बाढीका कारण मेची राजमार्गसँगै तमोर करिडोर, मध्यपहाडी लोकमार्ग, फिदिम–फालोट सडक खण्ड र रवि–दमक सडक खण्ड पनि अवरुद्ध भएका छन्। जिल्लाका अन्य क्षेत्रमा समेत सडक अवरुद्ध हुँदा जनजीवन प्रभावित भएको छ।