झापा, ६ असोज । झापा जिल्ला अदालतमा दसैँ बिदामा बन्दीप्रत्यक्षीकरणको रिट निवेदनमा सुनुवाइ गर्न बिहान ११ः०० बजेदेखि अपराह्न ३ः०० बजेसम्म अदालत खुला रहने भएको छ ।
दशैं अवधिमा घटस्थापना, विजयादशमी, कोजाग्रत पूर्णिमा र शनिबारको दिनबाहेक अन्य दिनहरूमा बन्दीप्रत्यक्षीकरणको रिट निवेदनमा सुनुवाइ हुने अदालत प्रशासनले जनाएको छ ।
अदालतका सेस्तेदार उपसचिव डिल्लीराम प्रसाइले हस्ताक्षर गरेको अदालतको सूचनामा भनिएको छ, ‘न्याय प्रशासन ऐन, २०७३ को दफा २६ बमोजिम उक्त अवधिमा पर्ने घटस्थापना, विजयादशमी, कोजाग्रत पूर्णिमा र शनिबारको दिनबाहेक अन्य दिनहरूमा बन्दीप्रत्यक्षीकरणको रिट निवेदन लिई सुनुवाइ गर्न बिहान ११ः०० बजेदेखि अपराह्न ३ः०० बजेसम्म अदालत खुला रहने हुँदा सम्बन्धित सबैको जानकारीको लागि यो सूचना प्रकाशित गरिएको छ ।’
सामान्यतयः अन्य सरकारी कार्यालय दशैका अवसरमा ६ दिन दशै विदा दिने गरे तापनि देशभरका अदालतहरु भने घटस्थापनाको दिनदेखी कोजाग्रत पूर्णिमाको दिनसम्म १५ दिन सार्वजनिक बिदा दिने गरिएको छ। तर सार्वजनिक बिदाको समयमा नियमितरुपमा सार्वजनिक सेवा प्रवाहको काम नहुने तर बन्दीप्रत्यक्षीकरण को निवेदन आएमा लिई सुनुवाई हुने कानुनी व्यवस्था रहेको छ भनि अदालतका प्रशासन शाखाका शाखा अधिकृत तथा सूचना अधिकारी रामचन्द्र बस्नेतले जानकारी दिए।
Nepali