मेचिनगर । झापाको मेचिनगर नगरपालिका–१५, बिचार्निस्थित ज्ञानदीप प्राथमिक विद्यालय अगाडि युथ फर सोसाइटी मेचीनगर -१५ को आयोजनामा समुदायस्तरीय फुल रोप्ने कार्यक्रम सम्पन्न भएको छ।
गाउँलाई हरियाली, स्वच्छ र आकर्षक बनाउने उद्देश्यले आयोजना गरिएको कार्यक्रममा बिचार्नी कीर्तन समूह, पाथीभरा कीर्तन समूह तथा युथ फर सोसाइटी मेचीनगर-१५ का सदस्यहरूको सक्रिय सहभागिता रहेको थियो। 
सहभागीहरूले आफूसँग भएका फुलका बिरुवा तथा सार्न मिल्ने फुलका बोटहरू रोपण गरेका थिए। फुलले वातावरणीय सौन्दर्य बढाउनुका साथै सामुदायिक चेतना अभिवृद्धि गर्ने भएकाले यस्ता कार्यक्रमलाई निरन्तरता दिइने युथ फर सोसाइटी मेचीनगर-१५ ले जनाएको छ।
कार्यक्रम सफल बनाउन प्रत्यक्ष सहयोग पुर्याउने ज्ञानदीप प्राथमिक विद्यालय, बिचार्नी कीर्तन समूह, पाथीभरा कीर्तन समूह तथा उपस्थित सबैलाई आयोजकले आभार व्यक्त गरेको छ। साथै, फुल रोपणका लागि माटो सहयोग गर्ने रेम्बो खवास, दीपी कटुवाल र सहयोगी राजकुमार राजबंशीप्रति विशेष धन्यवाद दिइएको छ। 
संस्थाका सदस्य स्मृति राउत र दीक्षा साहले समुदायको साथ, सहयोग र सद्भाव अमूल्य रहेको बताउँदै फुल रोप्ने अभियानले थप ऊर्जा प्रदान गरेको उल्लेख गरे। यस्तै, आयुस्क श्रेष्ठले रोपिएका फुलको संरक्षण र हुर्काइमा सबैको निरन्तर सहयोग आवश्यक रहेको बताइन।
Nepali